Adrazu na niekalki miačeciej adbylisia napady ŭ niekalkich haradach Francyi na nastupny dzień paśla terakta ŭ redakcyi časopisa Charlie Hebdo, arhanizacyju jakoha prypisvajuć radykalnym isłamistam. Abstaviny ŭčynieńnia hetych aktaŭ hvałtu i mahčymaja suviaź pamiž imi pakul nie vyjaŭlenyja.

Napad na miačeć adbyŭsia ŭ horadzie Por-ła-Nuviel u departamiencie Od na mižziemnamorskim uźbiarežžy. Stała viadoma, što złačyncy abstralali ź pistaleta malitoŭnuju zału viečaram 7 studzienia prykładna praz hadzinu paśla viačerniaj malitvy. Na toj momant pamiaškańnie ŭžo pustavała, paciarpiełych niama.

Jak paviedamiła hazieta Ouest-France, ranicaj 8 studzienia niekalki hranat było kinuta nieviadomymi ŭ dvor miačeci Sabłon u horadzie Le-Man. Razarvałasia tolki adna ź ich. Nichto pry hetym nie paciarpieŭ. Rajon vakoł kultavaha zbudavańnia ačepleny palicyjaj.

8 studzienia taksama pastupili paviedamleńni ab vybuchu ŭ horadzie Vilfranš-siur-Son na ŭschodzie Francyi. Incydent adbyŭsia ŭ restaranie, raźmieščanym u niepasrednaj blizkaści ad miascovaj miačeci. Infarmacyi ab paciarpiełych niama, taksama jak pakul nie zrazumieła i pryčyna vybuchu. Viadziecca rasśledavańnie, palicyja havoryć ab kryminalnym śledzie.

Jašče adno zdareńnie adbyłosia ranicaj 8 studzienia ŭ Manružy kala francuzskaj stalicy. Tam byŭ abstralany palicejski patrul. Dvoje palicejskich paranienyja, adna supracoŭnica palicyi paźniej pamierła. Pakul udałosia zatrymać tolki adnaho ŭdzielnika incydentu — 52-hadovaha mužčynu. Złačyniec, jaki adkryŭ pa patruli ahoń z aŭtamatyčnaj zbroi, uciok ź miesca złačynstva. Ciapier jaho šukajuć ułady.

Pradstaŭniki ŭład pakul nie zmahli ŭdakładnić, ci isnuje suviaź pamiž hetym incydentam i teraktam u redakcyi paryžskaha štotydniovika Charlie Hebdo.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?