«Naša Niva» adšukała jašče adnaho hramadzianina Biełarusi, jaki vajuje na baku «DNR». Jaho imia — Alaksiej, jamu 33 hady.
Fota z sacyjalnych sietak.
— Pa telefonie tut takija razmovy nie viaduć — prasłuška. Albo praź internet, albo na miescy, — zajaviŭ Alaksiej, pahadziŭšysia adkazać na našy pytańni. — Ale adrazu mahu nie adkazać, bo ŭ nas pavyšanaja bojehatoŭnaść. U Navarosii ja z pačatku vieraśnia.
«NN»: U Daniecku?
— Ciapier pamiž Danieckam i Maryupalem.
«NN»: U jakim bataljonie?
— 1 Cłavianskaja bryhada — raźviedka.
«NN»: Ty skazaŭ pra pavyšanuju bojehatoŭnaść. Dyk realnaha pieramirja niama?
— Nu, jano było krychu. A tak stralba idzie ŭsiudy. Prosta ciažkaha ŭzbrajeńnia vykarystoŭvajuć mała. Ale chutka, vidać, sčepimsia nadta mocna.
Fota z sacyjalnych sietak.
«NN»: Spynić vajnu mirna ŭžo nie ŭdasca?
— Nadta šmat nianaviści raźlita i kryvi.
«NN»: Što kankretna ciabie padšturchnuła pajechać vajavać?
— Zusim niadaŭna my žyli ŭ adnoj krainie i ŭ nas była supolnaja historyja i šlach. Ale nas zrabili adzin ad adnaho niezaležnymi. I pad fašysckimi łozunhami pačynajuć moj narod zabivać i kažuć, što tak i treba. Pa televizary pakazvajuć zabitych nie sałdat, a niavinnych dziaciej.
«NN»: U ciabie biełaruskaje hramadzianstva?
— Tak.
«NN»: Viedaješ, vidać, što ŭ Biełarusi mohuć aryštavać za najomnictva. Viartacca źbiraješsia?
— Mnie śviecić 15 hadoŭ. Pačakaju, pakul usio dakładna nie prajaśnicca.
«NN»: Łukašenka nie padtrymaŭ «Navarosiju».
— Łukašenka kidajecca pamiž Zachadam i Rasijaj. Tolki ŭ Rasii — braty, a na Zachadzie buduć adnosicca jak da chałopaŭ.
Byt u «DNR». Fota z sacyjalnych sietak.
«NN»: A što dumaješ pra biełarusaŭ na baku Kijeva?
— Rychtujucca zładzić toje ž samaje i ŭ Biełarusi.
«NN»: Ty słužyŭ u Marjinaj Horcy. Ty nie pieršy biełarus, jaki vajuje na baku «DNR», a słužbu prachodziŭ u častcy 89417. Supadzieńnie ci tam takija nastroi?
— Rychtujuć tam dobra. Dobraja baza dla dalejšaha raźvićcia.
«NN»: Za što ty vajuješ? Jakim vynik usiaho ŭjaŭlaješ?
— Ja vajuju za svoj narod. Za toje, kab nie zabivali žančyn i dziaciej. Za toje, što ty ruski. Da čaho pryjdzie — i tak zrazumieła: da poŭnaha źniščeńnia fašysckaha režymu ŭ Kijevie. I tolki tak.
Fota z sacyjalnych sietak.
«NN»: Čamu ty nazyvaješ siabie ruskim?
— Usie my ruskija. Jany padraździalajucca na vielikarosaŭ, małarosaŭ i biełarusaŭ. Tak ličyła katalickaja carkva ŭ XX stahodździ. Tamu va ŭsim śviecie nas ličać ruskimi. I jany nadta rady, što my pamiž saboj vajujem.
«NN»: Biełaruś ličyš častkaj «ruskaha śvietu»?
— Kali my byli adnoj krainaj, i niekalki zdradnikaŭ razvalili jaje, i my raptam stali niezaležnymi, to heta nie aznačaje, što my roznyja narody z roznym minułym. Kolki palityki ni vydumlajuć svaju historyju, u nas karani adny i budučynia adna.
