Apošnim časam Łukašenka aktyŭna staŭ naviedvać vajskovyja častki, a taksama pradpryjemstvy VPK. Łukašenka nie chavaje, što svojeasablivy adkaz na ŭkrainskija padziei. Padčas studzieńskaj pres-kanfierencyi dla biełaruskich i zamiežnych ŚMI kiraŭnik dziaržavy skazaŭ: «Ja treci raz madernizuju vojska, ja prystasoŭvaju jaho da taho, kab my mahli narmalna adkazać. Ja zrabiŭ vysnovy z ukrainskich padziej (vojska 500 tysiač pa kolkaści, a vojska niama)».
«Naša Niva» prasačyła, što kazaŭ Łukašenka pra biaśpieku krainy i madernizacyju vojska ad časoŭ kijeŭskaha Majdana da siońniašnich dzion.
Zachavać Su-27
«U bližejšy čas my vielmi surjozna pravierym na bojehatoŭnaść našy Uzbrojenyja siły. Dapuścim, ci treba nam Su-27 — vielmi mahutny i darahi samalot. U nas ich dva dziasiatki. Ja vykazaŭsia za toje, što nam treba padumać i zachavać hetyja samaloty na niejki, dapuścim, pahražajučy pieryjad, jak by heta doraha ni było. Zychodziačy z dośviedu vojnaŭ na arabskaj duzie, nam nie treba śpiašacca vyvodzić ź sistemy abarony našaj dziaržavy niejkija vidy techniki», — 18 listapada 2013 padčas naviedvańnia 61-j źniščalnaj avijacyjnaj bazy VPS i SPA (Baranavičy).
Zamiest miechanizavanych častak – śpiecnaz
«Moža być, nam nie treba stolki miechanizavanych častak, lepš mieć takija padrychtavanyja [siły śpiecapieracyj]. Moža być, dla Biełarusi siły śpiecapieracyj — pierśpiektyva», — 13 śniežnia 2013, naviedvajučy 5-ju asobnuju bryhadu śpiecnaza ŭ Marjinaj Horcy (Puchavicki r-n).
Treba damovicca z ukraincami
«Ukrainu siońnia faktyčna razvalili. A tam abaronka prystojnaja. Davajcie pasprabujem z ukraincami damovicca i papracavać razam, kab nie źnikli ich mazhavyja centry, intelektualnyja, inžyniernyja, kanstruktarskija i, ułasna, vytvorčaść. Ciapier momant prydatny, i hetym momantam treba skarystacca». Pry hetym Łukašenka adznačyŭ, što vajenna-techničnuju pradukcyju metazhodna vyrablać nie tolki dla ŭnutranych patrebaŭ, ale i dla zamiežnaha rynku. 2 krasavika 2014, naviedvańnie AAT «558 Avijacyjny ramontny zavod» (Baranavičy).
Stvaryć zienitny kompleks
24 červienia 2014, naviedvajučy pradpryjemstvy abarončaha siektara ŭ Barysavie, Alaksandr Łukašenka daručyŭ stvaryć ajčynny zienitny rakietny kompleks, jaki pa svaich charaktarystykach budzie nie horšy za S-300. Taksama jon skazaŭ, što Biełarusi patrebna mabilnaja armija z efiektyŭnym uzbrajeńniem. «Nam patrebna mabilnaja armija. My zrabili na heta staŭku. Tamu jaje treba abstalavać mabilnymi mašynami z efiektyŭnym uzbrajeńniem».
Mabilnyja mašyny
8 lipienia 2014 padčas naviedvańnia 103-j asobnaj hvardziejskaj mabilnaj bryhady śpiecnaza (Viciebsk) Alaksandr Łukašenka źviarnuŭ uvahu na toje, što biełaruskaje vojska nieabchodna abstaloŭvać mabilnymi srodkami. Łukašenku byŭ prademanstravany adzin z uzoraŭ takich mašyn, jakija źbirajucca na Minskim zavodzie kołavych ciahačoŭ. Kiraŭnik dziaržavy daručyŭ maksimalna łakalizavać vytvorčaść padobnaj techniki ŭ Biełarusi, źviarnuŭšy ŭvahu na jakaść. «Takija mašyny nam patrebnyja dla pavyšeńnia mabilnaści armii, — skazaŭ kiraŭnik dziaržavy. — SPA — dobra, ale nie daj boh nas nie padstrachujuć sa śpiny braty, i nam daviadziecca vieści vajnu samim».
Vyvučajem, prystasoŭvajemsia
«Umovy mianiajucca, niachaj nie kardynalna, ale my bačym, što adbyvajecca na tak zvanym teatry vajennych dziejańniaŭ u suviazi z kanfliktami, ich chapaje. My vyvučajem ich i, naturalna, nie možam nie reahavać, uličvajučy situacyju. Prychodzicca niedzie prystasoŭvacca da situacyi, mianiać mietady ŭzbrojenaj baraćby, kali treba budzie abaraniać krainu», — 19 lutaha 2015 padčas vystupu pierad kamandnym składam Uzbrojenych siłaŭ RB.
Zachavać aficeraŭ
«U płanavym paradku ja budu naviedvać i naviedvaju roznyja abjekty, analizuju dziejnaść našych siłavych struktur. Niadaŭna my razhladali aktualnyja pytańni raźvićcia Uzbrojenych Sił Biełarusi, zadačy pavyšeńnia abaranazdolnaści našaj dziaržavy ŭ ciapierašnich niaprostych hieapalityčnych umovach […] My ŭdzialajem peŭnuju ŭvahu i sacyjalnaj abaronienaści našych vajskoŭcaŭ. I nam treba padumać, jakija peŭnyja miery treba pryniać, zachavaŭšy kadravaje jadro, pa zamacavańni maładych aficeraŭ, skaračeńni ciakučaści kadraŭ», — 5 sakavika 2015 padčas naviedvańnia vajskovaj častki śpiecnaznačeńniaŭ Unutranych vojskaŭ MUS 3214.
Technałohii zaŭtrašniaha dnia
«Kraina tolki tady moža ličycca biaśpiečnaj i mieć pierśpiektyvy dla isnavańnia, u tym liku raźvićcia, kali jana budzie zajmacca technałohijami zaŭtrašniaha dnia», - 25 sakavika 2015 padčas naviedvańnia AAT «Pielenh», jakoje śpiecyjalizujecca na optyka-elektronnym abstalavańni.
