Alaksandr Łukašenka azadačyŭ mnohich, pryznačyŭšy pieršym namieśnikam kiraŭnika Administracyi prezidenta małaviadomaha Kanstancina Martynieckaha.
Usio ž raniej hetuju pasadu zajmali davoli jarkija asoby ŭ biełaruskim isteblišmiencie. Heta i Uładzimir Zamiatalin, i Stanisłaŭ Kniazieŭ, i Anatol Rubinaŭ, i Natalla Piatkievič. Da takich možna adnieści i Alaksandra Radźkova, jaki pakinuŭ pasadu ŭ śniežni minułaha hoda, pierajšoŭšy ŭ kancylaryju Łukašenki. Bolš za try miesiacy pasada pustavała.
Varta zaŭvažyć, što najčaściej pieršym namieśnikam u Administracyi stanovicca čałaviek, niejak źviazany ź ideałohijaj. Siońnia za ideałohiju ŭ Administracyi adkazvaje Ihar Buzoŭski. Praŭda, jon jašče davoli małady.
Što tyčycca Martynieckaha, to hety čałaviek absalutna niepubličny. Za doŭhija hady pracy niemahčyma znajści nivodnaha intervju hetaha čynoŭnika.
Viadoma, što Kanstancin Martyniecki naradziŭsia ŭ 1955 hodzie na samym poŭnačy Biełarusi ŭ Haradku Viciebskaj vobłaści. Paśla škoły pracavaŭ hruzčykam, a potym pajšoŭ na słužbu ŭ vojska.
Martyniecki skončyŭ Viciebski technałahičny instytut lohkaj pramysłovaści (1981). Miarkujučy ź bijahrafii — zavočna. Bo ŭ hety čas jon užo pracavaŭ u kavalskim cechu MAZa. Adrazu pa atrymańni vyšejšaj adukacyi Martynieckaha zabrali małodšym navukovym supracoŭnikam Biełaruskaha navukova-daśledčaha instytuta navukova-techničnaj infarmacyi i technika-ekanamičnych daśledavańniaŭ Dziaržpłana BSSR.
Była ŭ bijahrafii Martynieckaha i staronka pracy ŭ kampartyi. Navat bolej za toje. Cełych čatyry hady jon byŭ zahadčykam pramysłova-transpartnaha adździeła Maskoŭskaha rajonnaha kamitetu KPB Minska.
U 31-hadovym uzroście Martyniecki pierachodzić na pracu ŭ Minharvykankam načalnikam upraŭleńnia bytavoha absłuhoŭvańnia nasielnictva.
Ad časoŭ niezaležnaści Kanstancin Martyniecki traplaje ŭ aparat SND. Da 2000 hoda jon byŭ načalnikam administracyjna-haspadarčaha ŭpraŭleńnia, kiraŭnikom spraŭ Vykanaŭčaha Sakrataryjata SND. Kali kazać hruba, to taki čałaviek vykonvaje funkcyi «zaŭchoza».
Paśla hetaha Martyniecki pierachodzić na pracu ŭ Aparat Savieta ministraŭ, dzie i prabyŭ amal 15 hadoŭ.
Jakija tolki pasady jon tam nie mianiaŭ: pieršy namieśnik načalnika ŭpraŭleńnia pa spravach dziaržaŭnych orhanaŭ, pieršy namieśnik načalnika ŭpraŭleńnia pa ŭzajemadziejańni z respublikanskimi i miascovymi orhanami ŭłady i dziaržaŭnaha kiravańnia, načalnik hałoŭnaha ŭpraŭleńnia pa spravach dziaržaŭnych orhanaŭ, načalnik upraŭleńnia pa spravach dziaržaŭnych orhanaŭ Aparatu Savieta Ministraŭ Respubliki Biełaruś.
Niadoŭhi pieryjad jon byŭ kiraŭnikom sakrataryjata premjer-ministra Siarhieja Sidorskaha.
Urešcie, u 2007 hodzie jon byŭ pryznačany kiraŭnikom Aparata Savieta Ministraŭ. Heta adbyłosia paśla taho, jak papiaredniaha kiraŭnika aparata Valeryja Kazakieviča pryznačyli staršynioj kancerna «Biełnaftachim».
U śniežni 2014-ha Kanstancina Martynieckaha na pasadzie zamianiŭ były pasoł Biełarusi va Uźbiekistanie Ihar Sokał. Možna było dumać, što Martyniecki sydzie na adpačynak, bo jamu ŭžo 60 hadoŭ, ale jakraz u hety čas jon atrymaŭ pryznačeńnie na samuju vysokuju pasadu ŭ svajoj karjery.
