Sudom Lidskaha rajona vyniesieny prysud pa spravie ab tak zvanym kardšarynhu. U sudovaj praktycy krainy heta sprava jašče nie maje precedentaŭ.
Jak paviedamlaje UUS Hrodzienskaha abłvykankama, žychar Lidy, indyvidualny pradprymalnik, akazvaŭ svaje pasłuhi pa padklučeńni da spadarožnikavaha telebačańnia. Sam jon dobra raźbiraŭsia ŭ technałohijach i aprača lehalnaha padklučeńnia, davoli darahoha, prapanoŭvaŭ padklučycca šlacham kardšarynhu.
Sutnaść novaj technałohii zaklučajecca ŭ nastupnym: kali raniej dla niesankcyjanavanaha prahladu spadarožnikavych telekanałaŭ nieabchodna było nabyvać padroblenuju smart-kartu, to zaraz dastatkova padklučyć pryjomnik spadarožnikavaha viaščańnia da internetu. Śpiecyjalnaja prahrama, spałučajučysia ź siervieram, dekadziruje televizijny sihnał.
Padčas praviedzienych apieratyŭna-vyšukovych mierapryjemstvaŭ syščyki adździeła «K» zmahli ŭstanavić bolš jak sotniu klijentaŭ, jakija karystalisia pasłuhami złačyncy. Usie jany za 5 u. a. u miesiac atrymlivali pryvilejavany dostup da mnostva telekanałaŭ u najvyšejšaj jakaści.
Dziejańni padazronaha byli kvalifikavanyja jak niesankcyjanavany dostup da infarmacyi, jakaja zachoŭvajecca ŭ kampjutarnych sistemach ZAT «Nacyjanalnaja spadarožnikavaja kampanija» i AAT «NTV-PLUS», što supravadžaŭsia parušeńniem sistemy abarony, učynieny z karyślivaj zacikaŭlenaści (č. 2 art. 349 KK); zbyt śpiecyjalnych prahramnych srodkaŭ dla atrymańnia niepravamiernaha dostupu da abaronienych kampjutarnych sistem vyšejzhadanych tavarystvaŭ (art. 353 KK) i zaviedamaje vykarystańnie kampjutarnych prahram, pryznačanych dla niesankcyjanavanaha kapiravańnia infarmacyi, jakaja zachoŭvajecca ŭ kampjutarnych sistemach pravajdaraŭ spadarožnikavaha telebačańnia (č. 1 art. 354 KK).
17 sakavika sud Lidskaha rajona ŭ poŭnym abjomie pahadziŭsia z vysnovami orhanaŭ daznańnia i śledstva ŭ kvalifikacyi supraćpraŭnaj dziejnaści padsudnaha i vynies u dačynieńni da apošniaha abvinavaŭčy prysud, abaviazaŭšy vypłacić štraf u pamiery 200 bazavych vieličyń. Aprača hetaha, srodki, zaroblenyja złačynnym sposabam (16,5 młn rubloŭ i amal 2000 dołaraŭ), pavinny być viernutyja ŭ dachod dziaržavy.
