Francuzskija parłamientaryi padtrymali zakonaprajekt, jaki zabaraniaje vykarystańnie ŭ rekłamie i pakazach madelaŭ adzieńnia zanadta chudych maniekienščyc.
Zališniaja chudzizna madelaŭ budzie vyznačacca, zychodziačy ź indeksa masy cieła (BMI) — adnosinaŭ vahi čałavieka ŭ kiłahramach da kvadrata rostu ŭ mietrach.
Dla taho kab być pryniatymi na pracu maniekienščycaj, dziaŭčatam treba budzie pradastavić daviedku ad doktara ab tym, što ich BMI nie mienš za 18. Siarod francuzskich žančyn hety pakazčyk składaje ŭ siarednim 23,2.
Pa słovach daktaroŭ, kali vaš BMI u miežach ad 18,5 da 24,9, vas možna ličyć zdarovym. Adnak krytyki takoha padychodu pakazvajuć na toje, što heta nie lepšy sposab vyznačeńnia zdarovaj vahi.
Nacyjanalny sajuz madelnych ahienctvaŭ Francyi skardzicca na toje, što novy zakon udaryć pa kankurentazdolnaści francuzskich madelaŭ. Adnak miedyki i abaroncy pravoŭ žančyn viali doŭhuju kampaniju suprać vykarystańnia ŭ madelnaj industryi vyjaŭ dziaŭčat, na ich dumku, nienaturalnaj, niezdarovaj chudzizny.
U 2007 hodzie 28-hadovaja Izabel Karo, u minułym viadomaja francuzskaja fotamadel, pamierła ad anareksii, niezadoŭha da hetaha pryniaŭšy ŭdzieł u kampanii, jakaja raspaviadaje ab hetym zachvorvańni.
Pa novym zakonie, madelnamu ahienctvu, jaki prymaje na pracu dziaŭčat ź indeksam masy cieła mienš 18, pahražaje bujny štraf, a jaho ŭładalnikam — turemnaje źniavoleńnie na termin da šaści miesiacaŭ.
Paralelna byŭ uchvaleny jašče adzin zakonaprajekt, jaki vyvodzić za ramki zakona zaachvočvańnie anareksii i nakiravany na baraćbu ź internet-sajtami, jakija zaklikajuć da niebiaśpiečnaj straty vahi.
Prykładna 40 tysiač francuzaŭ pakutujuć ad anareksii, dzieviać ź dziesiaci z hetaj kolkaści — dziaŭčaty i žančyny.
