Dziesiać hadoŭ tamu adyšoŭ u viečnaść Papa Jan Pavieł II, jakoha Katalicki Kaścioł abviaściŭ śviatym. Jon nazyvaŭ siabie «pieršym Papam, paklikanym na Pasad cviatoha Piatra (…) sa słavianskich narodaŭ» («Slavorum Apostoli», 3). Z ułasnaha dośviedu ja viedaju, nakolki hłyboka hety Papa adčuvaŭ siabie słavianinam. Dla jaho heta było honaram i paklikańniem adnačasova. 

Na praciahu mnohich hadoŭ Karal Vajtyła byŭ izalavany ateistyčnym režymam i zmušany maŭčać.

Kali jon staŭ Papam, to svaju misiju chryścijanina i słavianina jon bačyŭ u tym, kab złamać naviazanaje maŭčańnie, abviaščać Chrysta ŭsiamu śvietu i śviedčyć ab svajoj «mocnaj nadziei na pastupovaje pieraadoleńnie ŭ Jeŭropie i ŭ śviecie ŭsiaho taho, što raździalaje Cerkvy, nacyi, narody» («Slavorum Apostoli», 2). 

Jan Pavieł II vielmi šmat padarožničaŭ. Jon ščyra lubiŭ kožnuju kulturu. Abdymajučy pradstaŭnikoŭ roznych krain abo apranajučy na siabie elemienty ich nacyjanalnaha kaściuma, Papa pakazvaŭ svaju nadzieju na adzinstva ŭsiaho śvietu. 

Jan Pavieł II mocna žadaŭ pryjechać taksama siudy, kab abniać biełarusaŭ na ich ziamli, tak blizkaj jaho sercu, ale jamu nie było dazvolena.

Jak pradstaŭnik Papy na biełaruskaj ziamli, ja chacieŭ by pažadać usim, kab uvaskrosły Chrystus dapamoh złamać barjery, jakija ludzi ŭparta praciahvajuć uznosić, i kab usie zmahli adčuć siabie adnoj siamjoj. 

Žadaju ŭsim być zdolnymi bačyć rečaisnaść vačami hramadzian śvietu, nikoha nie adpichvajučy i nie vyklučajučy.

Śviaty Jan Pavieł II, vyprasi ŭ Boha dla «svaich słavian» dar adzinstva i miru, biez zajzdraści, podłaści, baraćby, biez trahiedyi nasilla va Ukrainie.

Žadaju, kab biełarusy lepš razumieli svaju admysłovuju rolu ŭ budavańni słavianskaj jednaści, z pavahaj da raznastajnaści, i sa śviadomaściu ahulnaj spadčyny.

U hetym pracesie taksama i roznyja Cerkvy ŭciahvajucca ŭ pieraadolvańnie biasplonnych padziełaŭ, niezrazumiełych i nieprymalnych dla sučasnaha čałavieka, jakija asudziŭ sam Chrystus.

Zusim niadaŭna Dziaržaŭny Sakratar Jaho Śviataści Papy Franciška kardynał Pjetra Paralin naviedaŭ Biełaruś. Paśla svajho viartańnia jon raskazaŭ Papu pra hety vizit. Pantyfik byŭ vielmi ŭzrušany śviedčańniem svajho bližejšaha supracoŭnika. 

Papa Francišak błasłaŭlaje ŭsich biełarusaŭ i žadaje taho, što najbolš kaštoŭnaje ŭ žyćci: daryć luboŭ i być lubimymi. 

Taksama i kardynał Pjetra Paralin pieradaje vam pryvitańnie i dziakuje za vašu haścinnaść, jakuju jon u razmovie sa mnoj nazvaŭ «niezabyŭnaj».

Spadziajusia, što pryjdzie toj dzień, kali nie tolki pradstaŭnik, ale sam Papa Francišak zmoža pryjechać siudy, kab abniać vas, dazvalajučy hetym adčuć, jak mocna Boh vas lubić. Taksama i Jan Pavieł II uzrušycca ŭ niebie, bačačy, što jahonaje mocnaje žadańnie vykazać vam svaju luboŭ, narešcie, zmahło realizavacca.

 Darahija biełarusy, Chrystus uvaskros!

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?