Słuckim rajonnym adździełam Śledčaha kamiteta rasśledujecca kryminalnaja sprava ŭ dačynieńni da miascovaha žychara, 1987 hoda naradžeńnia, jaki abvinavačvajecca ŭ machlarstvie ŭ asabliva bujnym pamiery, paviedamlaje pres-słužba SK.

27-hadovy niepracujučy žychar h.Słucka, znachodziačysia ŭ niespryjalnym finansavym stanoviščy, pad roznymi padstavami pazyčaŭ u znajomych vialikija sumy hrašovych srodkaŭ, zahadzia nie majučy namieru vykonvać svaje abaviazacielstvy. U adnych vypadkach złamyśnik prasiŭ hrošaj na kuplu aŭtamabila, u inšych — stvaraŭ uražańnie surjoznaha čałavieka, jaki zajmajecca arhanizacyjaj kulturna-masavych mierapryjemstvaŭ dla zamiežnych hramadzian. Štoraz prydumlaŭ novuju padstavu ŭziać hrošy ŭ doŭh i pryčynu ich nie viartać, spasyłajučysia na roznyja ciažkaści.

Takim čynam, fihurant padmanuŭ kala 25 čałaviek, zajmajučy ŭ ich ad 100 da 5000 dalaraŭ. Šmat kamu pisaŭ raśpisku, u jakoj abiacaŭ viarnuć hrošy ź vialikimi adsotkami.

Zaraz pa kryminalnaj spravie dapytvajucca śviedki, pravodziacca vočnyja staŭki, ažyćciaŭlajecca vytvorčaść ekśpiertyz, u tym liku počyrkaznaŭčaja.

Dziejańni abvinavačanaha kvalifikavany pa č.4 art.209 (machlarstva, ździejśnienaje ŭ asabliva bujnym pamiery) Kryminalnaha kodeksa Respubliki Biełaruś. U dačynieńni da jaho ŭžytaja miera strymańnia ŭ vyhladzie zaklučeńnia pad vartu.

Śledstva nie vyklučaje, što achviaraŭ machlara moža być značna bolš, tamu prosić usich, chto vałodaje infarmacyjaj ab supraćpraŭnaj dziejnaści abvinavačanaha, źviarnucca ŭ Słucki rajonny adździeł Śledčaha kamiteta pa telefonie: 8 (01795) 5-24-38.

Клас
Панылы сорам
Ха-ха
Ого
Сумна
Абуральна