Pradzieda Alaksandra Doŭbika vysłali ŭ Sibir pry cary, dzieda i baćku rasstralali stalinisty, sam jon siadzieŭ u časy Chruščova.

30 sakavika na 95-m hodzie žyćcia pamior Alaksandr Doŭbik, vieteran vajny, viazień HUŁAHu. Čałaviek, jaki reštu žyćcia pryśviaciŭ adstojvańniu prava na spraviadlivuju kampiensacyju za savieckija represii. Alaksandr Safronavič zmahaŭsia nie tolki za ŭłasny honar, jon chacieŭ stvaryć precedent dla ŭsich tych biełarusaŭ, što trapili ŭ hułahaŭskija žorny.

Historyja rodu Alaksandra Doŭbika, jak i mnohich inšych biełarusaŭ, nadzvyčaj dramatyčnaja. Jahonaha pradzieda vysłali ŭ Sibir za dapamohu paŭstancu-kalinoŭcu. Dzieda i baćku rasstralali, źvinavaciŭšy ŭ špijanažy na karyść Polščy. Babula, maci i ciotka prajšli praź piekła łahieraŭ i vysyłki. U 1958 hodzie Alaksandr Doŭbik, udzielnik vajny, viaskovy nastaŭnik, atrymaŭ 10 hod mardoŭskich łahieraŭ. Jon napisaŭ listy tahačasnym kiraŭnikam ZŠA, Anhlii i Indyi, u jakich prasiŭ paŭpłyvać na kiraŭnictva SSSR. Adbyŭ pałovu terminu, byŭ reabilitavany ŭ 1991 hodzie. Adrezak žyćcia pamiž vyzvaleńniem z łahiera i reabilitacyjaj taksama byŭ nieprosty: nahlad śpiecsłužbaŭ, cisk na pracy, zvalnieńni.

U 1990-ja Alaksandr Safronavič dałučyŭsia da demakratyčnaha ruchu. Rehularna, pakul dazvalała zdaroŭje, udzielničaŭ u dziadoŭskich šeściach u Kurapaty. I praciahvaŭ pisać. Hetym razam ministru unutranych spraŭ Uładzimiru Navumavu i Mitrapalitu Fiłaretu — u pieršaha pytaŭ pra rasśledavańnie faktaŭ vandalizmu z Kurapatach, druhoha prasiŭ paspryjać pabudovie va ŭročyščy kaplicy.

U 2009 hodzie adbyŭsia pieršy sud, jakim viazień HUŁAHu raspačaŭ zmahańnie za hodnuju kampiensacyju za hady łahieraŭ. Na toj momant jon šosty hod žyŭ u inernacie dla sastarełych u Karelickim rajonie. Maryŭ nabyć kvateru ŭ Minsku, kab dažyć viek pobač ź siemjami synoŭ.

Ułady nie znajšli srodkaŭ dla niespraviadliva asudžanaha viaźnia HUŁAHu. Što, miž inšym, nie pieraškodziła im paspryjać stvareńniu adyjoznaha komleksa «Linija Stalina». Alaksandr Safronavič dajšoŭ da Viarchoŭnaha suda, źbiraŭsia źviartacca ŭ mižnarodnyja arhanizacyi. Ale niaŭmolny čas uziaŭ svajo.

Žychar Kareličaŭ Alaksandr Samiec, jaki apošnija amal dziesiać hadoŭ adviedvaŭ byłoha viaźnia ŭ internacie, ładziŭ jamu sustrečy z žurnalistami, raskazaŭ pra adno z apošnich žadańniaŭ Alaksandra Doŭbika.

— Jon raskazvaŭ, što treba napisać pa jaho śmierci na mahile. Prasiŭ pobač z proźviščam dy inicyjałami paznačyć «A.K.». Ja pažartavaŭ, što jon u Armiju Krajovu zapisaŭsia, a Alaksandr Safronavič patłumčyŭ — «A.K. » značyć achviara kamunizmu, — raskazaŭ Alaksandr Samiec.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?