gazetaby.com
Fota tatuiroŭki, jakuju zrabiŭ sabie na «chimii» palitviazień Jury Rubcoŭ, trapiła ŭ sacsietki. Homielski aktyvist abraŭ dla tatu nadpis «Łukašenka, sychodź», paviedamlaje Gazetaby.com.
Taksama stała viadoma, što siońnia Juryja Rubcova vyvieźli z ŭstanovy adkrytaha typu №7 u Kuplinie Pružanskaha rajona, dzie jon addbyvaje pakarańnie, u rajonny adździeł Śledčaha kamiteta ŭ Pružany, nibyta dla praviadzieńnia śledčych dziejańniaŭ. Pry hetym Rubcova vyvieli z terytoryi z asabistymi rečami, paviedamlaje spring96.org
Jak paviedamiŭ aktyvist Leanid Kułakoŭ, niečakanymi śviedkami hetaha etapavańnia stali siabry i paplečniki palitźniavolenaha, jakija pryjechali siońnia ź Miensku, kab praviedać Rubcova i pieradać jamu nieabchodnyja rečy i pradukty charčavańnia.
Zaraz jany nakiravalisia śledam za milicejskim aŭtamabilem u Pružany, kab vyśvietlić padrabiaznaści vykliku Rubcova da śledčych.
Pravaabaronca Leanid Sudalenka paviedamiŭ, što suprać Juryja Rubcova zaviedziena kryminalnaja sprava pa artykule 415 Kryminalnaha kedeksu (uchileńnie ad adbyćcia pakarańnia ŭ vyhladzie pazbaŭleńnia voli). Hety artykuł praduhledžavaje pazbaŭleńnie voli terminam na 3 hady.
***
Nahadajem, što 6 kastryčnika 2014 Juryja Rubcova prysudzili da «chimii» na dva z pałovaj hady (hod adrazu skaracili pa amnistyi) za abrazu sudździ Kiryła Pałulecha. Pravaabaroncy adznačali, što sudovy praces prachodziŭ sa šmatlikimi parušeńniami, i sapraŭdnaj pryčynaj prysudu stała palityčnaja aktyŭnaść Rubcova.