Fiodar Lisica. Fota lesgazeta.by
Jaho abvinavacili ŭ złoŭžyvańni ŭładaj i słužbovymi paŭnamoctvami. Pavodle śledstva, Lisica niezakonna nabyŭ ziamielny ŭčastak, pabudavaŭ i pryvatyzavaŭ žyły dom, niametava vykarystoŭvaŭ biudžetnyja srodki.
Na hetym tydni ŭ jakaści śviedki vyklikali ministra lasnoj haspadarki Michaiła Amieljanoviča. Amal dźvie hadziny jon adkazvaŭ na pytańni prakurora i advakataŭ. I ŭvieś čas abaraniaŭ svajho padnačalenaha.
«Fiodara Dzianisaviča ja viedaju ad 1999 hoda jak najprystojniejšaha, najsumleńniejšaha kiraŭnika. Z padnačalenych patrabavaŭ vykanańnia abaviazkaŭ i byŭ strohi da siabie».
Adzin z epizodaŭ, u jakim vinavaciać Lisicu, tyčycca słužbovaj kvatery ŭ stalicy. Kali ŭ 2010 jon pierajechaŭ u Minsk na vysokuju pasadu, u jaho nie było tut svajho kuta. Zasialili ŭ słužbovuju kvateru RVC-Les (centr pavyšeńnia kvalifikacyi) u ahraharadku Ždanovičy. Tam jon zrabiŭ darahi ramont, u jakim nie było patreby, na dumku abvinavaŭcy, zakupiŭ za dziaržhrošy meblu. A paśla pasprabavaŭ i pryvatyzavać.
«Kvatera pustavała praciahły čas. U toj čas byŭ užo stvorany kaapieratyŭ «Les-2010», u jakim usie supracoŭniki RVC-Les stajali ŭ čarzie. I kali im prapanoŭvali hetuju kvateru, to jany ŭsie admaŭlalisia: bo ich vyklučyli b tady z kaapieratyva», — davodzić zakonnaść zasialeńnia ministr.
Ale kvatera była ŭ kiepskim stanie. Bačyŭ usie jaje chiby i Amieljanovič. Budynak, u jakim žyŭ Lisica, uklučaje ŭ siabie try kvatery, vučebny korpus, spartzału. Tut pravodziacca i ministerskija narady.I ramont adbyvaŭsia nie vyklučna ŭ adnym pamiaškańni.
«Ramont patrabavaŭsia. Ściana była takaja, što pramiarzała. Kali b my nie zrabili ramont u hety pieryjad, z 2010 pa 2012, budynak moh by razvalicca. Ja kali zachodziŭ da Lisicy, źviarnuŭ uvahu: «Jak ty žyvieš?» Padłoha ŭspušana była, na ścienach — ćvil».
«Najprystojniejšy čałaviek i kiraŭnik», — paŭtaraŭ Amieljanovič.
A paśla vyjšaŭ ukaz Łukašenki, jaki dazvalaŭ słužbovaje žytło pryvatyzavać. U ministerstvie tady dva supracoŭniki pačali źbirać adpaviednyja dakumienty. I Lisica, kali pra heta daviedaŭsia, paprasiŭ uklučyć u śpis na pryvatyza cyju i jaho. Tak i zrabili, pakolki mieŭ patrebu ŭ žytle — u Minsku.
Ale praces pryvatyzacyi spyniła pravierka Kamiteta dziaržkantrolu: kantralory paličyli, što ŭsia pracedura niezakonnaja. I ŭ vyniku ni adzin z traich rabotnikaŭ ministerstva nie atrymaŭ zapavietnyja kvatery va ŭłasnaść.
«U mianie taksama byli sumnieńni»
Ministr Amieljanovič akazaŭsia daśviedčanym kiraŭnikom: prynamsi, u kursie ŭsich spraŭ Lisicy. Choć siabroŭskich adnosin nie padtrymlivali.
Jon paznajomiŭsia ź Lisicam paśla svajho pryznačeńnia ŭ 1999-m na pasadu dyrektara Minskaha dziaržaŭnaha vytvorčaha lesahaspadarčaha abjadnańnia: kuryravaŭ usie lashasy vobłaści. Tamu jon prakamientavaŭ i budaŭnictva doma ŭ vioscy Tyčyny. Amieljanovič akurat byŭ na budoŭli hetaha doma, jaki ciapier adzin z hałoŭnych kozyraŭ u rukach abvinavaŭcy: katedž pabudavaŭ za košt lashasa, a zatym jaho pryvatyzavaŭ pa zanižanym košcie.
Hety dom, pa słovach ministra, budavaŭsia adrazu nie pad Lisicu: adrazu nie viedali, kamu z rabotnikaŭ dastaniecca. Ale kiraŭnik maje pieršačarhovaje prava na atrymańnie słužbovaha žytła. «Dumaju, tam parušeńniaŭ niama».
Miž inšym, Amieljanovič na sudzie chvalavaŭsia, časam hłytaŭ słovy. I ništo nie vydavała ŭ im ministra — havaryŭ biez pychi. A kali skončyŭsia amal dvuchhadzinny dopyt, jon prajaviŭ inicyjatyvu i zrabiŭ zajavu pa inšym epizodzie.
U 1999 hodzie jeździŭ pa laśnictvach. Zajechaŭ u Jaskavičy da Lisicy. «Staić tam vysoki dom. Ja padumaŭ, što heta budynak laśnictva. A jon kaža: «Heta dom, jaki my budujem razam ź siamjoj». U mianie adrazu ŭźnikli sumnieńni, jak jon moh pabudavać dom na terytoryi dziaržlashasa. I tady jaho žonka pryniesła dakumienty, pa jakich sielsaviet vydzieliŭ ziamlu dla budaŭnictva doma: mienavita na ziemlach sielsavieta». Maŭlaŭ, hety epizod paćviardžaje sumlennaść jaho byłoha padnačalenaha.
Pa słovach ministra, na siońnia ziemleŭparadkavalnyja i lesaŭparadkavalnyja karty ŭ krainie nie zaŭždy supadajuć. I jašče ciapier praciahvajecca praca pa ich unarmavańni. Heta da pytańnia, što ŭčastak Lisicy ŭ Jaskavičach pa niekatorych dakumientach naležaŭ da lasnoha fondu, i jon niezakonna vyvieŭ ziamlu i pabudavaŭsia.
U pracesie abvieščany pierapynak: čakajucca vyniki ekśpiertyzy. Advakaty rychtujuć dadatkovyja dakumienty i novych śviedak pa spravie.
