Jak stała viadoma «Našaj Nivie», novaabrany rektar Jeŭrapiejskaha humanitarnaha ŭniviersiteta (EHU) Devid Polik dahetul nie padpisaŭ pracoŭny kantrakt z alma-matar.

Devid Polik. Fota EHU. 

Devid Polik. Fota EHU. 

Devid Polik byŭ pryznačany rektaram Jeŭrapiejskaha humanitarnaha ŭniviersiteta 10 krasavika, bolš za try miesiacy nazad. Pierad tym jon zajmaŭ pasadu pieršaha prarektara EHU, a z kastryčnika 2014 hoda vykonvaŭ abaviazki rektara ŭniviersiteta.

Paśla pryznačeńnia rektaram Polik za try miesiacy tak i nie padpisaŭ pracoŭnaha kantrakta. Nie padpisaŭšy novaha kantrakta, Polik praciahvaje atrymlivać zarobak vykanaŭcy abaviazkaŭ zhodna sa starym kantraktam. Roźnica składaje kala 10 tysiačaŭ jeŭra na miesiac. Heta ŭ šmat razoŭ bolš za zarobak rektara najbolšaha ŭ Litvie Vilenskaha ŭniviersiteta. Kantrakt ža rektara praduhledžvaje utraja mienšy miesiačny zarobak.

Kazytlivy momant zaklučajecca ŭ tym, što ŭ EHU Polik pieršapačatkova byŭ zaprošany ŭ jakaści kansultanta. U jaho abaviazki, u tym liku, uvachodzić azdaraŭleńnie finansavaj situacyi va ŭniviersitecie, jaki skardzicca na chraničny deficyt srodkaŭ.

Nakolki nam viadoma, Paŭnočnaja Rada, jakaja kiruje daviernym fondam EHU, staviła pierad Kiraŭničaj Radaj EHU zadaču vyrašyć prablemu z padpisańniem Polikam novaha kantrakta, adnak pakul hetaha nie adbyłosia.

Kiraŭnik (Chief of Staff) ofisa hienieralnaha sakratara Paŭnočnaj Rady ŭ Vilni Kienet Broman paćvierdziŭ «Našaj Nivie», što situacyja ź niepadpisańniem kantrakta Devidam Polikam maje miesca ŭ EHU.

«Paŭnočnaja Rada nie adkazvaje za kantrakty supracoŭnikaŭ EHU, heta zadača Kiraŭničaj rady. Adnak Paŭnočnuju Radu jak adkaznuju za trastavy fond EHU arhanizacyju nadzvyčaj niepakoić situacyja, jakaja skłałasia ŭ dadzieny momant u EHU. Niadaŭna ja razmaŭlaŭ sa staršynioju Kiraŭničaj rady EHU Danielem Taršysam i my pahadzilisia, što prablema budzie vyrašana ciaham bližejšych dzion», — paviedamiŭ «Našaj Nivie» Broman.

Prafiesar Devid Polik atrymaŭ stupień doktara fiłasofii va Univiersitecie Atavy (Kanada) u halinie fienamienałohii hiermienieŭtyki, estetyki i historyi mastactvaŭ.

Da svajho pierajezdu ŭ Vilniu Polik byŭ prezidentam amierykanskich vyšejšych navučalnych ustanoŭ.

U EHU Polik pieršapačatkova byŭ zaprošany ŭ jakaści kansultanta. U jaho zadačy jak rektara ŭvachodzić, u tym liku, azdaraŭleńnie finansavaj situacyi va ŭniviersitecie. Jon nie havoryć ni pa-biełarusku, ni pa-rasiejsku.

Jaho abrańnie supravadžałasia krytykaj nieprazrystaści pracesu. Staršynia asacyjacyja vypusknikoŭ EHU Siarhiej Charytonaŭ apublikavaŭ źviestki, što na papiarednim miescy pracy Polik pryvioŭ amierykanski kaledž da finansavaha pravału, prytym zabiaśpiečyŭšy nieapraŭdana vialikija vypłaty sabie. Lidary dumak ź Biełarusi prasili admianić vybary i pryznačyć novyja, ź jasnaj kankurencyjaj. Adnak Polik staŭ rektaram EHU, niahledziačy na krytyku.

Pavodle našaj infarmacyi, Polik atrymlivaje jak v.a. prykładna 220 tysiač jeŭra za hod plus 60 tysiač jak kampiensacyju na pieraloty i žytło. Jahony zarobak jak rektara maje być prykładna na 10 tysiač jeŭra ŭ miesiac mienšy.

Atrymać kamientar ad EHU pa pytańni padpisańnia sp.Polikam kantrakta nam nie ŭdałosia.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?