Styvien Ełap. Fota: IBTimes
Karparacyju Microsoft pakinie šerah klučavych fihur, u tym liku načalstva mabilnaha padraździaleńnia. Jak paviedamlajecca na sajcie Microsoft, budzie stvoranaje novaje padraździaleńnie Windows and Devices Group, adkaznaje adnačasova za apieracyjnuju sistemu i ŭsimi pryładami, što pracujuć na apieracyjnych sistemach kampanii.
Microsoft pakinuŭ były hiendyrektar Nokia Styvien Ełap, vice-prezident Microsoft Mobile Džo Charłoŭ (jakaja pryjšła ŭ Microsoft razam z Ełapam), Mark Pen, adkazny za kampaniju dyskredytacyi Google «Scroogled», vice-prezident pa biźnies-rašeńniach Kiryła Tatarynaŭ i vice-prezident pa stratehii Eryk Ruder.
«Hetyja źmieny dazvolać nam pastaŭlać lepšyja pradukty i pasłuhi, što palubilisia našym klijentam, u bolš chutkim tempie», — prakamientavaŭ kadravyja pierastanoŭki hiendyrektar Microsoft Satja Nadeła.
***
Microsoft niekali była adnym ź lidaraŭ na rynku mabilnych apieracyjnych sistem z Windos Mobile. Z vychadam iPhone i apieracyjnaj sistemy iOS, a zatym i Android ad Google, kampanija zhubiła lidarstva. Na siońnia dola Windows Phone na rynku smartfonaŭ składaje kala 2,7%.
U 2013 hodzie Microsoft nabyła telefonnaje padraździaleńnie Nokia i likvidavała brend smartfonaŭ Nokia, hiendyrektar Nokia Styvien Ełap pierajšoŭ na pracu ŭ Microsoft. Ełapa nazyvali «trajanskim kaniom» u Nokia — maŭlaŭ, jon davioŭ kampaniju da «zdačy» Microsoft.
Nokia tym časam straciła prava vypuskać pad svaim brendam smartfony i pierajšła da vypusku «zvaniłak», telekamunikacyjnaha abstalavańnia i kłonaŭ iPad. Uviesnu 2015 hoda Nokia abviaściła ab pakupcy za 15 młrd jeŭra telekamunikacyjnaj kampanii Alcatel-Lucent.
