Biełaruś nie daje zhody na toje, kab praź jaje hazavuju sistemu kampanija Klaipėdos nafta ažyćciaŭlała tranzit hazu sa svajho terminała zvadkavanaha pryrodnaha hazu (TZPH) va Ukrainu.
«Zacikaŭlenaść z našaha i ŭkrainskaha boku jość, mahčymaści dla supracoŭnictva jość, ale biełaruski bok nam admoviŭ. Budziem prykładać usie namahańni, kab možna było pastaŭlać ZPH va Ukrainu, jakaja sa svajho boku taksama šukaje kropki supracoŭnictva ź Biełaruśsiu», — prakamientavała ahienctvu BNS pres-ataše kampanii Klaipėdos nafta Indre Milinienie. Pavodle jaje słoŭ, va Ukrainu možna było b pastaŭlać prykładna 1 młrd. kubičnych mietraŭ u hod. Haz moža pastaŭlacca z Kłajpiedskaha TZPH u Biełaruś, a adtul adpaviednaja kolkaść — va Ukrainu.
Ministr enierhietyki Litvy Rokas Masiulis u siaredzinie krasavika śćviardžaŭ, što paśla prakładki hazapravoda Polšča — Litva možna budzie pastaŭlać haz i va Ukrainu. Ministerstva enierhietyki Litvy raspracoŭvaje źmianieńni ŭ zakon ab TZPH, jakija dazvolać impartavany ŭ Statoil haz pierapradavać nie z terminała, a kali jon znachodzicca jašče ŭ mory.
Na prośbu BiełaPAN prakamientavać hetu infarmacyju ŭ AAT «Hazprom transhaz Biełaruś» zajavili: «Aficyjnych kamientaryjaŭ nie budzie».