Kyky.org zabłakavali pa zajavie Viačasłava Dzijanava, biełarusa, jaki ciapier žyvie ŭ Polščy i atrymaŭ tam palityčny prytułak. «Naša Niva» sabrała piać faktaŭ pra adnaho z samych supiarečlivych ajčynnych aktyvistaŭ.
Davieranaja asoba Ramančuka i Michaleviča
Dzijanaŭ naradziŭsia ŭ 1987 hodzie, paśla siamja pierajechała ŭ Minsk. Vučyŭsia ŭ Biełaruskim technałahičnym univiersitecie. U 2008 hodzie Dzijanaŭ byŭ davieranaj asobaj Alesia Michaleviča, jaki sprabavaŭ abracca ŭ biełaruski parłamient.
«Ruch Budučyni», dzie Dzijanaŭ pačynaŭ svaju hramadskuju dziejnaść, staŭ zaŭvažalnaj moładzievaj strukturaj u 2009 hodzie, choć u značnaj stupieni virtualnaj. Ich supołka ŭ «VK» na toj momant naličvała 220 000 udzielnikaŭ i była samaj vialikaj u krainie. Siońnia tam zastałosia tolki 30 tysiač. Pazicyjanavali jany siabie jak «inavacyjny ruch moładzi, jaki adčuvaje, što dla Radzimy nabližajucca vialikija pieramieny». Užo tady «Ruch» krytykavali jak prajekt KDB, Dzijanaŭ admaŭlaŭ suviazi sa śpiecsłužbami. U 2009 jany atrymali aficyjnuju rehistracyju ŭ Ministerstvie justycyi i praviali pieršuju kampaniju — za admienu šenhienskich viz dla biełarusaŭ.
Aktyvisty «Ruchu Budučyni», u tym liku sam Viačasłaŭ, ładzili dastatkova niejtralnyja akcyi, vystupali na mierapryjemstvach «Libieralnaha kłuba». Kali Dzijanaŭ anhažavaŭsia ŭ pracu arhanizacyi, jon pierastaŭ naviedvać zaniatki ŭ BDTU i byŭ adličany.
Na miascovych vybarach 2010 hoda Dzijanaŭ vystaŭlaŭ svaju kandydaturu ŭ Šuhajeŭskaj akruzie ŭ Minsku.
Pradstaŭniki «Ruchu», u tym liku Dzijanaŭ, na vybarach 2010 hoda padtrymali Jarasłava Ramančuka, brali ŭdzieł u zbory podpisaŭ i vybarčych pikietach. Viačasłaŭ značyŭsia jak davieranaja asoba kandydata.
Paśla razhonu 19 śniežnia 2010 hoda Dzijanaŭ źjechaŭ ź Biełarusi.
Maŭklivyja akcyi
Majučy vielizarnuju kolkaść udzielnikaŭ, «Ruch Budučyni» dadaŭ da nazvy «RPSS» (revalucyja praz sacyjalnyja sietki), i staŭ kaardynacyjnym centram maŭklivych akcyj u 2011 hodzie. Ličycca, što Dzijanaŭ i jaho kamanda nie byli niepasrednymi aŭtarami idei, ale mienavita jany zrabili akcyi masavymi pa biełaruskich mierkach. Praź niekalki miesiacaŭ i paśla aryštu socień udzielnikaŭ pratesty ścichli, Dzijanaŭ napisaŭ adkryty list, dzie pryznaŭ ich pravał, a taksama toje, što nie maje dastatkovaha dośviedu palityčnaj baraćby i aŭtarytetu ŭ Biełarusi.
Łukašenka zhadvaŭ Dzijanava
U 2011 hodzie Łukašenka, havoračy pra zmovu zamiežnych śpiecsłužbaŭ i sproby destabilizavać abstanoŭku ŭ Biełarusi, zhadaŭ i Dzijanava.
«Kali ja zaŭvažyŭ, što heta nielha ihnaravać, ja paklikaŭ śpiecsłužby i paprasiŭ dać poŭnuju infarmacyju ab tym, što adbyvajecca, pačynajučy ad Dzijanava, jakoha naša «piataja kałona» i ŭsia žoŭtaja presa cytavała jak ledź nie hieroja. I što akazałasia: siadzić u Polščy za kamiennymi ścienami pad achovaj śpiecsłužbaŭ. Nijakich tam revalucyjanieraŭ biełaruskich niama. Heta jany, tyja, chto pieršapačatkova zmahalisia i zmahajucca suprać nas, vykarystoŭvajuć našych chłopcaŭ — ludziej, jakija pahnalisia za hrašyma i trapili ŭ hetyja sietki».
Śpiecsłužby tady nie prosta dali prezidentu infarmacyju, ale i sprabavali šantažavać dziaŭčynu Dzijanava. Jaje zatrymali na miažy, u łeptopie zachoŭvalisia jaje fotazdymki ŭ styli niu. Kab apiaredzić ich publikacyju i nie dać padstaŭ dla manipulacyj, para tady sama vykłała ich u sieciva.
«Naša Niva» publikavała intervju ź dziaŭčynaj, dzie jana apaviadała ich historyju kachańnia.
Vyhnali z prahramy Kalinoŭskaha
Źviestak pra toje, što Dzijanaŭ sapraŭdy siadzieŭ pad achovaj polskich śpiecsłužbaŭ, nie majecca, zatoje dakładna viadoma — za miažoj «maŭklivy revalucyjanier» pastupiŭ na prahramu Kastusia Kalinoŭskaha i prachodziŭ moŭnyja kursy ŭ Krakavie. Adkul byŭ adličany za propusk zaniatkaŭ. U 2013 jon znoŭ pasprabuje stać stypiendystam, ale biespaśpiachova.
U 2012 hodzie u Varšavie jon zasnavaŭ i uznačaliŭ fond «Intehracyjny most». Dziaŭčyna Dzijanava, Marharyta Łavyšyk, značycca tam skarbnikam. Jahonym namieśnikam u toj čas byŭ Uładzimir Kumiec, paplečnik pa «Ruchu Budučyni». Kumiec na vybarach supracoŭničaŭ z «Havary praŭdu» i byŭ adličany z univiersiteta, a paśla pryznaŭsia ŭ supracy z KDB. Jaho tady asabista pakrytykavaŭ Uładzimir Niaklajeŭ. Ciapier jon navučajecca va univiersitecie ŭ Hdańsku.
U 2013 hodzie fond praciahnuŭ rehistracyju, ale adšukać dadzienyja pra ich dziejnaść za apošnija dva hady nie ŭdałosia. Za čas emihracyi Dzijanaŭ časta vystupaŭ na biełaruskim Mediabarcampje, jaki ładzicca ŭ Litvie. Kažuć, jaho vystupy byli fiejeryčnymi.
Dzijanaŭ vioŭ kałonku na Naviny.by, paśpieŭ atrymać premiju «Lublu Biełaruś», jakuju ŭručaŭ «Małady Front». Naminavali jaho ŭ 2012 hodzie za arhanizacyju «maŭklivych akcyj». U tyja časy jon «lubiŭ» nie tolki Biełaruś, ale i «DDT», Coja i «NRM».
Pravadyr «ruskaha śvietu»
U 2014-m pačynajecca samaja fiejeryčnaja častka bijahrafii Viačasłava Dzijanava. U svaim fejsbuku i ŭ błohu na «Biełaruskim partyzanie» jon pastupova «pierafarboŭvajecca ŭ adepta ruskaha mira». Jon piša pra žadańnie atrymać rasijski pašpart, viadziecca na rozyhryšy 1863x.com z prapanovaj pracy na rasijskuju prapahandu, vystupaje za prava biełarusaŭ atrymlivać rasijskija pašparty. Pačytać padrabiaźniej i prasačyć transfarmacyju Dzijanava možna ŭ jahonym błohu na «Biełaruskim partyzanie».
Ciapier Dzijanaŭ žyvie ŭ polskaj Zialonaj Hury, dzie navučajecca va ŭniviersitecie. Siabie apisvaje jak «sacyjalista, seksista, marksista, pucinista, technicysta, internacyjanalista, prahresivista i avanturysta».