Sud Leninskaha rajona Minska adpraviŭ na pierahlad administracyjny pratakoł u dačynieńni da 38-hadovaha biespracoŭnaha Juryja Šulhana, jaki pretenduje na pasadu prezidenta Biełarusi. 

Šulhan byŭ zatrymany viečaram 18 červienia ŭ kvatery svajho siabra ŭ Leninskim rajonie Minska. Pakinuŭšy siońnia budynak suda, jon skazaŭ BiełaPAN, što milicyjaniery «faktyčna nie vystavili nijakich abvinavačańniaŭ». «Prosta pryjechali na kvateru siabra, zabrali mianie i pratrymali noč u kamiery», — skazaŭ Šulhan. 

Ranicaj 19 červienia, pavodle słoŭ Šulhana, jaho dastavili ŭ sud, dzie sudździa ŭdakładniŭ jaho pašpartnyja danyja i paviedamiŭ, što składzieny na jaho administracyjny pratakoł budzie pierahledžany. U čym kankretna jaho pieršapačatkova vinavacili, Šulhan tak i nie ŭdakładniŭ. Z pratakołam jon nie aznajomiŭsia, bo «byŭ ščaślivy, što jaho tak chutka vyzvalili». 

Raniej kiraŭnik pieradvybarnaha štaba Šulhana Pavieł Kanavalčyk mierkavaŭ, što pryčynaj zatrymańnia mahli stać niavypłačanyja štrafy pa administracyjnych pravaparušeńniach, ale sam Šulhan tak nie dumaje. 

Jon paćvierdziŭ, što maje vialikuju kolkaść niavypłačanych štrafaŭ, u tym liku za raśpivańnie śpirtnych napojaŭ u hramadskim miescy i bieźbiletny prajezd. Adnak, na dumku Šulhana, kali b sprava była ŭ niavypłačanych štrafach, to jaho nie adpuścili b z suda, a pakarali b administracyjnym aryštam, jak heta było prykładna hod tamu. Tady, skazaŭ biespracoŭny, za niavypłatu šmatlikich štrafaŭ jaho asudzili na 10 sutak aryštu. 

Zatrymańnie Šulhan źviazvaje sa svajoj hramadskaj aktyŭnaściu i namieram udzielničać u prezidenckich vybarach. 

Nahadajem, na pres-kanfierencyi 20 maja Juryj Šulhan zajaviŭ, što šturškom, jaki prymusiŭ jaho vyłučacca kandydatam u prezidenty, stała pryniaćcie našumiełaha dekreta № 3 ab praduchileńni sacyjalnaha ŭtrymanstva. Pavodle słoŭ Šulhana, jon vyrašyŭ vyłučacca kandydatam u prezidenty «nie z-za zarpłaty, a z pačućcia adkaznaści za darmajedaŭ». 

Vykładčyk historyi pa adukacyi, Šulhan apošnija 15 hadoŭ nie pracuje. «Ja nie mahu ŭ siońniašniaj krainie vykładać realnuju historyju, a ašukvać dziaciej ja nie mahu» — tak jon tłumačyć svoj status biespracoŭnaha.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?