Nabyŭ moc pryhavor, vyniesieny 51-hadovamu žycharu Baranavičaŭ za zachoŭvańnie i raspaŭsiudžvańnie videazapisaŭ parnahrafičnaha źmiestu.
Jak paviedamiła prakuror adździeła prakuratury Bresckaj vobłaści Viera Fiłonik, u śniežni 2014 hoda ŭ siabie doma mužčyna skapiravaŭ ź internetu čatyry parnahrafičnyja videaroliki. Zatym raźmiaściŭ ich na svajoj staroncy ŭ sacyjalnaj sietcy «UKantakcie», daŭšy mahčymaść prahledzieć hetuju parnahrafiju nieabmiežavanaj kolkaści karystalnikaŭ internetu.
Hetyja videaroliki byli vyjaŭlenyja supracoŭnikami milicyi i 17 studzienia 2015 hoda vydalenyja. U dačynieńni da mužčyny raspačali kryminalnuju spravu.
22 krasavika sud Baranavickaha rajona i horada Baranavičy pryznaŭ jaho vinavatym u zachoŭvańni z metaj rekłamavańnia i rekłamavańni parnahrafičnych materyjałaŭ z vykarystańniem internetu (č. 2 art. 343 KK) i pryhavaryŭ da dvuch hadoŭ pazbaŭleńnia voli ŭ kałonii ahulnaha režymu. Pavodle pryhavoru suda ŭ jaho kanfiskavany kampjutar.
Fihurant kryminalnaj spravy paličyŭ hety pryhavor zanadta surovym i abskardziŭ jaho.
Sudovaja kalehija pa kryminalnych spravach Bresckaha abłasnoha suda 19 červienia pakinuła kasacyjnuju skarhu biez zadavalnieńnia. Razam z tym kalehija dastasavała da abvinavačvanaha art. 8 zakona «Ab amnistyi ŭ suviazi z 70-hodździem Pieramohi ŭ Vialikaj Ajčynnaj vajnie 1941—1945 hadoŭ» i na adzin hod skaraciła pakarańnie ŭ vyhladzie pazbaŭleńnia voli.
Pryhavor nabyŭ moc. Mužčyna maje vyšejšuju adukacyju, raniej nie sudzimy, pracavaŭ na adnym z baranavickich pradpryjemstvaŭ.
