Finlandyja i Šviecyja nie buduć sumiesna prymać rašeńnie ab ustupleńni ŭ NATA, zajaviŭ telekampanii Yle finski prezident Sauli Niiniste. «U nas niama takoj aŭtamatyčnaj suviazi, što kali adzin prymie rašeńnie, to inšy zrobić toje ž samaje», — skazaŭ prezident, dadaŭšy, što, «naadvarot, zdajecca, što praces pryniaćcia rašeńniaŭ źjaŭlajecca vielmi składanym». Jon adznačyŭ, što ŭstupleńnie Finlandyi ŭ NATA patrabuje praviadzieńnia refierendumu.

Taksama kiraŭnik dziaržavy padkreśliŭ, što Rasija razhladaje aljans jak pahrozu. «Jany [Rasija] nie chočuć, kab pahroza raspaŭsiudziłasia da ich miežaŭ», — skazaŭ jon.

Kažučy pra svajo bačańnie situacyi, Niiniste padkreśliŭ, što ličyć, što nieabchodnaści mianiać biahučuju palityku niama.

U studzieni stała viadoma, što Finlandyja acenić mahčymaść ustupleńnia ŭ NATA. Dla hetaha była stvorana kamisija, jakaja składałasia z byłoha finskaha ambasadara ŭ Šviecyi Matsa Bierhkvista, kiraŭnika Finskaha instytuta mižnarodnych adnosin Teje Ciilikajniena, byłoha pasła Finlandyi ŭ Rasii i Hiermanii Rene Niubierha i staršyni Mižnarodnaha instytuta stratehičnych daśledavańniaŭ i Ženieŭskaha centra palityki biaśpieki Fransua Ejsbura.

Dva dni tamu Reuters paviedamiŭ, što byŭ składzieny dakład, zhodna ź jakim siabroŭstva Finlandyi ŭ NATA ŭzmocnić biaśpieku krainy, adnak pryviadzie da surjoznaha kryzisu ŭ adnosinach z Rasijaj i zaškodzić ekanamičnym suviaziam dźviuch krain.

U dakumiencie niama rekamiendacyj ab tym, ci varta Chielsinki ŭstupać u aljans, adnak adznačajecca, što sumiesnaja finska-šviedskaja zajaŭka ab siabroŭstvie «budzie lepšaj stratehičnaj opcyjaj», čym ustupleńnie hetych krain paasobku.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?