U dvuch zatrymanych 29 krasavika ŭ Minsku viełasipiedystaŭ prajšli vobšuki, paviedamiŭ pravaabarončy resurs spring96.org.

Stanisłava Kanavałava 30 krasavika pryviali dadomu ŭ kajdankach supracoŭniki milicyi. Pry susiedziach, jakija byli paniatymi, praviali vobšuk: šukali fłeš-nazapašvalniki i inšyja nośbity infarmacyi. U vyniku zabrali žorstki dysk kampjutara, paśla čaho źjechali razam z zatrymanym. Anałahičnyja padziei adbylisia i ź inšym zatrymanym — Dźmitryjem Palijenkam.

Uviečary 29 krasavika pravaabaroncy paviedamili ab zatrymańni nie mienš jak šaści viełasipiedystaŭ — udzielnikaŭ akcyi «Krytyčnaja masa», u tym liku hramadzianina Rasii. Prykładna 35 čałaviek sabralisia kala opiernaha teatra, kab prajechać pa horadzie na viełasipiedach i zajavić ab pravach viełasipiedystaŭ na darozie. Taksama na miescy zboru było zaŭvažana 10 supracoŭnikaŭ milicyi ŭ cyvilnym i čatyry amapaŭcy. Za padziejami sačyŭ naziralnik ad Biełaruskaha Chielsinkskaha kamiteta Kirył Kožanaŭ, jaki jechaŭ pa tratuary ŭ kancy kałony. La steły «Minsk — horad-hieroj» kaniec kałony viełasipiedystaŭ padrezaŭ bardovy mikraaŭtobus, adtul vyskačyli supracoŭniki AMAP, jakija zatrymali šeść čałaviek, u tym liku naziralnika BCHK. «Maładych ludziej zakinuli ŭ aŭtobus tvaram u padłohu, im nanosili ŭdary ŭ žyvot i pa tvarach. Źvierchu na zatrymanych zakinuli viełasipiedy i advieźli ŭ Centralnaje RUUS. Mahčyma, zatrymanaja bolšaja kolkaść udzielnikaŭ «Krytyčnaj masy», — paviedamlali pravaabaroncy.

Naziralniki, jakija znachodzilisia kala RUUS, «bačyli praz akno, jak chłopcaŭ pa čarzie padvodzili da stała i davali raśpisacca ŭ papierach. Potym usich zatrymanych pastavili tvaram da ściany, a ŭ hety čas da budynka padjechaŭ bardovy mikraaŭtobus, u jakim pryvieźli chłopcaŭ». «Prykładna ŭ 23.30 adnaho z chłopcaŭ adpuścili. Jon paviedamiŭ, što zatrymanymi zastajucca jašče piać čałaviek, usich prymušali padpisać pratakoł ab administracyjnym pravaparušeńni. Dvoje chłopcaŭ admovilisia heta rabić, u ich zabrali asabistyja rečy, u tym liku šnurki. Chłopcaŭ vypuskajuć, z RUUS vykočvajuć viełasipiedy zatrymanych. Ale dvaich, što nie padpisali pratakoły, vidavočna adviazuć u CIP», — pisali pravaabaroncy.

HUUS Minharvykankama apublikavała ŭ sacyjalnych sietkach svaju viersiju incydentu z hrupaj viełasipiedystaŭ: «Kala teatra opiery i baleta sabralisia viełasipiedysty ŭ kolkaści ad 20 da 30 čałaviek. Niekalki ź ich mieli pry sabie čorna-zialonyja ściahi. Prykładna ŭ 19.20 kałona nakiravałasia ŭ bok muzieja Vialikaj Ajčynnaj vajny. U rajonie steły «Minsk — horad-hieroj» hrupa viełasipiedystaŭ, hruba parušajučy patrabavańni pravił darožnaha ruchu, vyjechała na prajeznuju častku. Na nieadnarazovyja patrabavańni supracoŭnikaŭ DAI (apošnija vymušanyja byli vykarystać hukaŭzmacnialnuju aparaturu i probliskavyja majački) nie reahavali. Pry sprobie spynić supraćpraŭnyja dziejańni i viarnuć ich na tratuar, parušalniki pravaparadku akazali niepadparadkavańnie zakonnym patrabavańniam supracoŭnikaŭ milicyi. A adzin z udzielnikaŭ kinuŭsia ŭ bojku z supracoŭnikam DAI, paškodziŭšy jamu formiennaje abmundziravańnie. Šaściora zavadataraŭ bojki byli zatrymanyja i dastaŭlenyja ŭ Centralnaje RUUS h. Minska dla razboru. Ich dziejańniam dajecca pravavaja acenka. Bolš padrabiazna pra zdareńnie my raskažam zaŭtra ranicaj».

Razam z tekstam apublikavanaja fatahrafija padranaj kurtki supracoŭnika DPS.

Ranicaj 30 krasavika bolš padrabiaznaj infarmacyi HUUS nie źjaviłasia. Pa stanie na poŭdzień 1 maja jana pa-raniejšamu adsutničała.

«Krytyčnaja masa» — suśvietny ruch viełasipiedystaŭ, jakija źbirajucca ŭ svaich nasielenych punktach u apošniuju piatnicu miesiaca.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?