NATA pavinna reahavać na dziejańni Rasii z dapamohaj siły i pierakanaŭčych strymlivajučych faktaraŭ.

Pra heta zajaviŭ hienieralny sakratar NATA Jens Stołtenbierh u intervju niamieckamu vydańniu Die Welt i aljansu jeŭrapiejskich haziet LENA (Leading European Newspaper Alliance), piša Niamieckaja chvala.

«Maskva niezakonna anieksavała Krym, padtrymlivaje sieparatystaŭ na ŭschodzie Ukrainy i parušaje mižnarodnaje prava. Mienavita tamu my pašyrym svaju prysutnaść na ŭschodnich miežach aljansu», — adznačyŭ Stołtenbierh.

Pavodle jaho słoŭ, ciapier abmiarkoŭvajecca varyjant, zhodna ź jakim u kožnaj z krain Bałtyi i ŭ Polšču budzie nakiravany mižnarodny bataljon, hetyja siły buduć znachodzicca ŭ režymie ratacyi. Kančatkovaje rašeńnie budzie pryniata da pačatku samitu krain-siabroŭ NATA ŭ Varšavie ŭ lipieni 2016 hoda.

«Pa vyznačeńni Maskvy, «istotnyja bajavyja siły» — heta pastajannaje znachodžańnie nie mienš za 1000 sałdat u adnoj dziaržavie, jakaja ŭvachodzić u NATA. Da hetaha pakazčyka nam daloka», — zajaviŭ hienieralny sakratar.

Taksama jon adznačyŭ, što ništo nie pakazvaje na toje, što RF u najbližejšaj budučyni napadzie na lubuju z krain, jakija ŭvachodziać u aljans.

«Adnak my pavinny być padrychtavanyja, pavinny zabiaśpiečyć dziaržavam-siabram NATA poŭnuju salidarnaść i adnačasova pravodzić palityku strymlivańnia», — skazaŭ Stołtenbierh i nazvaŭ hetyja miery «abhruntavanymi, abaronnymi i adpaviednymi mižnarodnamu pravu».

Jon padkreśliŭ, što NATA nie šukaje kanfrantacyi z Rasijaj i nie imkniecca da chałodnaj vajny. Taksama jon adznačyŭ, što ŭsie mierapryjemstvy źjaŭlajucca reakcyjaj na anieksiju Kryma i destabilizacyju na ŭschodzie Ukrainy.

Taksama Hienieralny sakratar NATA adznačyŭ, što kanały dla palityčnaha dyjałohu pavinny być adkrytyja, kab praciahvać šukać sposaby źnižeńnia napružanaści i ryzyki vajennych incydentaŭ. Pry hetym jon nie vyklučyŭ, što da samitu ŭ Varšavie adbudziecca jašče adna sustreča ŭ ramkach Rady Rasija-NATA.

Клас
0
Панылы сорам
0
Ха-ха
0
Ого
0
Сумна
0
Абуральна
0