Raskamnahlad zabłakavaŭ na terytoryi Rasii dostup da sajta «Krym.Realii», jaki źjaŭlajecca prajektam viaščalnaj arhanizacyi «Radyjo Svaboda» i raspaviadaje pra toje, jak žyvuć ludzi na anieksavanym Rasijaj paŭvostravie.
«Pa materyjałach, sabranym prakuraturaj Kryma, Raskamnahlad pravodzić pracedury pa błakavańni dostupu da hetaha prajekta», - cytuje TASS zajavu krymskaha prakurora Natalli Pakłonskaj.
Pavodle dadzienych samoha sajta «Krym.Realii», dostup da jaho pačali błakavać ŭ sieradu, 11 maja. Pra heta vydańniu paviedamili jahonyja čytačy z roznych rehijonaŭ Rasii i z samoha Kryma. Zabłakavać sajt paśpieli nie ŭsie pravajdery.
Na sajcie Raskamnahladu paviedamlajecca, što dostup da sajta abmiažoŭvajecca rašeńniem prakuratury ad 25 vieraśnia 2015 hoda.
Raniej stała viadoma, što prakuratura Kryma zapadozryła sajt u ekstremisckaj dziejnaści. Pakłonskaja patłumačyła, što publikacyi prajekta «ŭtrymlivajuć u sabie apraŭdańnie dyviersij, ekstremizm i biaskoncuju dyskredytacyju orhanaŭ ułady ŭ Krymie, raspalvańnie mižnacyjanalnaj varožaści». U krasaviku sabranyja dadzienyja byli pieradadzienyja Hienieralnaj prakuratury Rasii.