Sudździa Dźmitryj Łukaševič Frunzienskaha sudu Miensku paŭtorna adpraviŭ pensijanera Alaksandra Łapickaha na prymusovaje lačeńnie ŭ psychijatryčnym špitali va ŭmovach zvyčajnaha nahladu.
Sud pryznaŭ Łapickaha, jakomu 80 hod, vinavatym u naŭmysnaj publičnaj źniavazie Alaksandra Łukašenki, hienprakurora Alaksandra Kaniuka i jašče niekalkich prakuroraŭ i sudździaŭ. Pavodle sudu, heta Alaksandr Łapicki zrabiŭ u elektronnych pasłańniach da čynoŭnikaŭ. Pry hetym sud vyrašyŭ, što złačynstvy Alaksandr Łapicki ździejśniŭ u nieśviadomym stanie, bo pakutuje na psychičnuju chvarobu, i tamu nia moža nieści za ich adkaznaść. Alaksandru Łapickamu pryznačanaje prymusovaje lačeńnie ŭ psychijatryčnym špitali va ŭmovach zvyčajnaha nahladu.
«Heta niespraviadlivy sud i asabistaja pomsta mnie z boku Łukašenki i jahonych čynoŭnikaŭ. Mnie pomściać za toje, što ja zapadozryŭ Łukašenku ŭ arhanizacyi vybuchu ŭ metro ŭ 2011 hodzie, a taksama za inšyja krytyčnyja vykazvańni nakont jaho i jahonych čynoŭnikaŭ», — prakamentavaŭ prysud Alaksandar Łapicki i skazaŭ, što budzie jaho abskardžvać ciaham 10 dzion.
Heta ŭžo druhoje rašeńnie sudu pra nakiravańnie Alaksandra Łapickaha na prymusovaje lačeńnie ŭ «varjatniu». Raniejšaje takoje rašeńnie, pryniataje ŭ krasaviku hetym ža Frunzienskim rajonnym sudom u inšym składzie paśla skarhi pensijanera ŭ Mienski haradzki sud u červieni było skasavanaje i nakiravanaje na novy razhlad. Adnak novy sud paćvierdziŭ byłoje rašeńnie.
Pravaabaronca Aleh Voŭčak kaža pra parušeńnie prava Łapickaha na abaronu i toje, što biełaruskija ŭłady metanakiravana pieraśledujuć pensijanera.
«Ułada nia lubić i baicca krytyki, a tamu raspraŭlajecca z usimi, chto jaje krytykuje. Z Łapickim u ich nia vielmi atrymlivałasia, bo jon vielmi adukavany i učepisty čałaviek, da taho ž pensijaner. Maładoha b chutka znajšli za što začapić i adpravili b u turmu «padumać ab pavodzinach», a tut nie atrymałasia. Tamu — dla Łapickaha abrali varjatniu. Što da novaha sudu, dyk u im jašče bolš spravu zabłytali. Pa-pieršaje, nie skasavali vynikaŭ psychijatryčnaj ekspertyzy, z-za čaho sam Alaksandr Łapicki byŭ pazbaŭleny prava siabie baranić. Pa-druhoje, sud nie razhladaŭ aryhinałaŭ dakumentaŭ, a tolki ich nibyta kopii, nia vyśvietliŭ, jakuju škodu Łapicki nibyta nanios Łukašenku i jahonym čynoŭnikam. A toje, što jon vykazvaŭ svajo mierkavańnie na ich adras —dyk heta harantavana Kanstytucyjaj. My budziem dalej zmahacca za Alaksandra Łapickaha, bo heta zmahańnie za naša ahulnaje prava na svabodu mierkavańniaŭ i ich vykazvańniaŭ», — skazaŭ pravaabaronca Aleh Voŭčak.
Pavodle Alaksandra Łapickaha jahony kanflikt z vyšejšymi biełaruskimi čynoŭnikami pačaŭsia paśla vychadu ŭ 1999 hodzie jahonaj knihi «Za žaleznaj zasłonaj», u jakoj jon pracytavaŭ vykazvańni Alaksandra Łukašenki adnosna Hitlera.
