Alaksandr Łukašenka pryznačyŭ novaha pasła Biełarusi ŭ Kitai. Im staŭ pamočnik prezidenta ŭ pytańniach ekanomiki Kirył Rudy, jaki mieŭ reputacyju «rynačnika» i «libierała» ŭ najvyšejšych ešałonach ułady. Pravodziačy Rudaha ŭ Kitaj, «Naša Niva» zhadała cikavyja fakty ź jaho bijahrafii.

Stažyravaŭsia ŭ ZŠA

Na pasadzie pamočnika prezidenta Kirył Rudy adpracavaŭ ad červienia 2013 hoda. Rudy byŭ adnym z najmaładziejšym u vyšejšych ešałonach ułady. Jon pryjšoŭ na vysokuju pasadu nie z kazarmaŭ i nie z vykankamaŭskich kabinietaŭ. Pierš čym trapić va ŭładu, Rudy zrabiŭ vydatnuju navukovuju karjeru. Kandydatam navuk staŭ užo ŭ 23 hady, a doktaram — u 33.

Navukovyja zacikaŭlenaści Rudaha — finansy, kredyty, finansavyja kryzisy. Jon aŭtar niekalkich navučalnych dapamožnikaŭ. Voś śpis jahonych publikacyj.

Kirył Rudy byŭ stypiendystam prahramy Fułbrajta, jakaja finansujecca ŭradam ZŠA, i nakiravanaja na praviadzieńnie navukova-daśledčaj raboty ŭ adnym z univiersitetaŭ Amieryki. Na praciahu čatyroch miesiacaŭ biełarus stažyravaŭsia ŭ Čykaha. Kazaŭ, što jaho vybrali na prahramu, bo «ŭziaŭ usich svajoj maładościu, zapałam i kamunikabielnaściu».

Pracavaŭ u Čykaha nad «płanam finansavaj stabilizacyi krain SND». Adrazu ž skazaŭ, što źjazdžać u Štaty nazaŭsiody jon nie źbirajecca, tak i vyjšła.

Viartańnie ŭ Kitaj

Da pryznačeńnia ŭ Administracyju Kirył Rudy pracavaŭ ekanamičnym daradcam u pasolstvie Biełarusi ŭ Kitai. U svaich navukovych pracach Rudy pisaŭ pra «ŭzmacnieńnie ŭpłyvu KNR u śviecie». «Niahledziačy na składanaść kitajskaj movy, u apošnija hady jaje papularnaść u śviecie raście, što najpierš źviazana z rostam i nieabchodnaściu ekanamičnaha supracoŭnictva z Kitajem».

Što datyčyć samoj pracy, to tut infarmacyi nie tak šmat. Viadoma, što Kirył Rudy vioŭ pieramovy z kitajskim Dziaržbankam ab supracoŭnictvie ź Biełaruśsiu. Braŭ udzieł u raspracoŭcy prajekta kitajska-biełaruskaha industryjalnaha parka, što maje paŭstać pad Smalavičami.

Prapanoŭvaŭ «Finansavuju dyjetu»

Pad kiraŭnictvam Kiryły Rudaha nie tak daŭno vyjšła adna z samych znakavych knih apošniaha času – «Finansavaja dyjeta. Reformy dziaržaŭnych finansaŭ Biełarusi». Varta adznačyć, što da pracy z «Finansavaj dyjetaj» byli pryciahnutyja ekśpierty ź niezaležnych ekpiertnych centraŭ, jak Beroc i IPM.

Rudy prapanoŭvaŭ dastatkova libieralnyja rečy ŭ hetaj knizie. Naprykład, vyvieści z padnačaleńnia Ministerstvaŭ pradpryjemstvy i akunuć ich u bolš svabodnaje płavańnie. Rudy mierkavaŭ, što stymuły dla pracy pradpryjemstvaŭ nie pavinny abaviazkova być administracyjna-kamandnyja, a mohuć i dobraachvotna-rynačnyja. Rudy vystupaŭ za bolš šyroki płast pryvatnych ułaśnikaŭ.

«Mienavita libierały staviać pryjarytetam sacyjalnuju śfieru. Jany vystupajuć za adukacyju, achovu zdaroŭja, kulturu. U svoj čas mienavita libierały, a nie kansiervatary admianili rabstva, uviali piensii, dapamohu pa biespracoŭi, dapamohu siamji. Libierały abaraniajuć ekałohiju, vystupajuć za hiendarnuju roŭnaść. Tamu ŭ hetym sensie kniha źjaŭlajecca vyklučna libieralnaj. Bo hałoŭnym pryjarytetam «finansavaj dyjety» staić sacyjalnaja śfiera», — kazaŭ Rudy na minskaj prezientacyi knihi.

«Kali pacyjent na sadzicca na dyjetu, chvaroba moža prahresavać», — vobrazna kazaŭ čynoŭnik.

Ahučvaŭ niepapularnyja idei

Časta z vusnaŭ Kiryły Rudaha čulisia prapanovy, paśla jakich čakać stanoŭčaj reakcyi hramadstva nie vypadała. Naprykład, mienavita pamočnik prezidenta ahučyŭ ideju skaračeńnia dekretnaha adpačynku da 2 hadoŭ.

«Efiekt praciahłaha adpačynku pa dohladzie za dziciem nieadnaznačny. Bolšaść žančyn ciaham čatyroch-šaści miesiacaŭ adnaŭlajucca paśla rodaŭ, kali niama ŭskładnieńniaŭ. Tamu šmat jakija jeŭrapiejskija krainy pradstaŭlajuć apłočany adpačynak mienavita na hety pieryjad», — kazaŭ jon.

Taksama Rudy mierkavaŭ, što piacihadovaje adroźnieńnie ŭ vychadzie na piensiju dla mužčyn i žančyn słabaarhumientavanyja. I pryvodziŭ prykład, što hiendarnaja roŭnaść u piensijnym pytańni charakternaja dla raźvitych krain.

Zaklikaŭ viartacca biełarusaŭ-emihrantaŭ i šanavaŭ movu

U Rudaha byli svaje dumki i adnosna kadravaj palityki dziaržavy. Naprykład, jon vykazaŭ ideju adnosna viartańnia ŭ krainu biełarusaŭ-emihrantaŭ, što atrymali dobruju zachodniuju adukacyju.

«Paśla raspadu Savieckaha Sajuza byli chvali emihracyi. Mnohija našyja suajčyńniki źjechali za miažu, i jany paśpiachovyja tam u mižnarodnaj śfiery, na suśvietnych rynkach», – tłumačyŭ jon. Na dumku Rudaha, žadajučych viarnucca było b dastatkova. Adnak z momantu tych zajavaŭ prajšło dva hady, ale nivodzin viartniec nie atrymaŭ u Biełarusi vysokich pasad.

Taksama eks-pamočnik prezidenta ŭpeŭnieny, što budučynia za tymi ludźmi, jakija kultyvujuć nacyjanalnuju kulturu, movu, suvierenitet.

Šmat čaho ź idejaŭ Kiryły Rudaha tak i nie byli realizavanyja. Pakul nieviadoma, chto budzie novym pamočnikam prezidenta ŭ ekanomicy.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?