Słuchańnie hučnaj spravy ŭ sudzie Centralnaha rajona Minska praciahnułasia 12 lipienia. Akramia biźniesmiena Uładzimira Japryncava i jaho syna Kaźbieka, taksama biźniesmiena, na łavie padsudnych znachodzicca partnior Japryncava-małodšaha namieśnik hiendyrektara kampanii «TMST» Alaksandr Arabian.

Historyja z zatrymańniem Japryncava źviazanaja z bujnymi daŭhami biźniesmienaŭ i niaŭdałaj sprobaj ich viarnuć. Pavodle infarmacyi paciarpiełych, Kaźbiek Japryncaŭ abiacaŭ pastaŭki paliva šerahu zamiežnych kampanij, ale paśla atrymańnia srodkaŭ nie vykonvaŭ abaviazacielstvy. Ździełki byli harantavanyja hrupaj kampanij «Trajpł». Hrošy pieraličvalisia na rachunak kampanii Edena Investments, mažarytarnym uładalnikam jakoj źjaŭlajecca Japryncaŭ-małodšy, adnak paliva partniory tak i nie atrymali.

Kab viarnuć daŭhi, suma jakich składaje niekalki dziasiatkaŭ miljonaŭ dołaraŭ, Kaźbiek Japryncaŭ, zhodna sa źviestkami śledstva, spačatku sprabavaŭ zarabić na Foreksie, ale prahareŭ i źviarnuŭsia pa dapamohu da baćki. Toj u svaju čarhu źviarnuŭsia pa dapamohu da svajho siabra, prezidenta Fiederacyi spartyŭnaj baraćby Rasii Michaiła Mamiašvili, jaki pahadziŭsia dać Japryncavu bujnuju sumu pad harantyi jaho doli ŭ kampanii «Trajpł». Paśla zatrymańnia Uładzimira Japryncava Mamiašvili staŭ saŭładalnikam «Trajpła».

Paciarpiełymi pa spravie pryznanyja troje: dyrektar kampanii «Haztrans» (Estonija) Andrej Rabcevič, supracoŭnik «Vitalura» ŭ minułym viadomy lohkaatlet Andrej Michnievič i rasijski biźniesmien Juryj Saviak. Rabcevič i Michnievič dali pakazańni na minułym tydni. Dopyt Saviaka pačaŭsia 11 lipienia i atrymaŭ praciah siońnia.

Vyśvietliłasia, što Uładzimir Japryncaŭ straciŭ svaju dolu ŭ kampanii «Trajpł» 19 žniŭnia 2015 hoda — u hety dzień pa 16,75% akcyj atrymali rasijskija biźniesmieny Michaił Mamiašvili i Iosif Aksienćjeŭ. 66,5% akcyj zastavalisia va ŭładalnika «Trajpła» Juryja Čyža, jaki taksama znachodzicca pad śledstvam pa inšaj kryminalnaj spravie i ŭtrymlivajecca ŭ SIZA KDB.

Pavodle słoŭ Saviaka, Mamiašvili i Aksienćjeva jon dobra viedaŭ. «Ja viedaju, što jany pavinny viarnuć Vałodziu (Japryncavu. — BiełaPAN.) akcyi nazad, kali jon addaść doŭh», — skazaŭ paciarpieły.

Zhodna ź infarmacyjaj, što prahučała ŭ sudzie, častka hrošaj z rachunkaŭ kampanij Japryncava-małodšaha Saviaku ŭsio ž taki pastupiła — advakat Arabiana naličyŭ bolš za 1 młn. dołaraŭ. Napiaredadni Saviak śćviardžaŭ, što hrošy ad Japryncava da jaho «tak i nie dajšli».

Zychodziačy z pakazańniaŭ paciarpiełych, ich hałoŭnaja meta — viarnuć svaje hrošy. Miarkujučy pa ŭsim, hramadzianskija iski jany nie padavali, bo raźličvajuć, što ŭ kryminalnym pracesie praściej spahnać daŭhi. Adnak Japryncava i Arabiana abvinavačvajuć u machlarstvie. I ich mohuć abaviazać nie tolki viarnuć hrošy, ale i pryhavaryć da realnych terminaŭ.

Tamu hałoŭnym pytańniem zastajecca, ci mieli abvinavačanyja ašukanskija mety, heta značyć pieršapačatkova pry zaklučeńni kantraktaŭ nie źbiralisia pastaŭlać tavar i viartać hrošy.

Jak paviedamiŭ Saviak, adzin kantrakt usio ž byŭ vykanany — 5 młn. dołaraŭ jamu viarnuli. I paciarpieły nastojvaje, što ŭ hetaj častcy ŭ jaho pretenzij niama. Jon taksama dapuskaje, što Arabian i Japryncaŭ-małodšy mahli ŭvieści ŭ zman Uładzimira Japryncava ŭ pytańni vykanańnia dahavoraŭ. «Ja viedaŭ, što Vałodzia staraŭsia dapamahčy. Kaźbiek mnie skazaŭ, što ŭsie maje hrošy (24 młn. dołaraŭ. — BiełaPAN.) prajhraŭ na biržy», — zajaviŭ u sudzie Saviak.

Sud taksama zasłuchaŭ pakazańni staroha siabra Japryncava-starejšaha Siarhieja Kitajeva. Jon zajaviŭ, što dvojčy asabista pryvoziŭ hrošy Mamiašvili, Saviaku i Aksienćjevu na ahulnuju sumu 800 tysiač dołaraŭ u košt pahašeńnia doŭhu Kaźbieka Japryncava.

Pavodle słoŭ śviedki, jon taksama prysutničaŭ u banku, kali Japryncaŭ-starejšy pierapisaŭ na Mamiašvili i Aksienćjeva 33% svaich akcyj «Trajpła». Byŭ na toj sustrečy i Saviak. Dahavor byŭ taki: kali Uładzimir Japryncaŭ da kanca 2015 hoda addaje doŭh za Kaźbieka, jamu viartajuć akcyi «Trajpła».

Pry zaklučeńni dahavora ŭ banku Mamiašvili i Aksienćjeŭ hrošy Japryncavu-starejšamu nie pieradavali. Pra heta ŭ sudzie zajaviŭ jašče adzin śviedka, siabar Uładzimira Japryncava. Jon taksama skazaŭ, što dvojčy pieradavaŭ Mamiašvili i jaho partnioram hrošy na ahulnuju sumu 1 młn. dołaraŭ.

U jakaści śviedki sud dapytaŭ i žonku Uładzimira Japryncava Śviatłanu. Jana raskazała, što paśla aryštu muža i syna dvojčy sustrakałasia z Mamiašvili. Pieršy raz — u kancy 2015 hoda, žančyna pryjazdžała da jaho ŭ Maskvu i prasiła dapamohi. Druhaja sustreča adbyłasia 22 lutaha, na joj prysutničaŭ Aksienćjeŭ.

«Mamiašvili skazaŭ, što treba addavać 16,4 młn. dołaraŭ. Toje, što Vałodzia ŭžo viarnuŭ, jon abiacaŭ paličyć za 10 młn. dołaraŭ. Kazaŭ pieradać hetyja hrošy praz advakataŭ. Aksienćjeŭ u hety čas ŭstaŭlaŭ repliki, što kali nie vierniem hrošy, muž žyvym nie vyjdzie. Kazaŭ, kab ja nie prybiadniałasia, maŭlaŭ, u nas hrošy i nieruchomaść u ZŠA. U nas ničoha tam niama. Heta adzinaja kraina, kudy ja nie chaču jechać. Aksienćjeŭ jašče skazaŭ, što ja taksama mahu sieści za kraty», — paviedamiła žonka Uładzimira Japryncava.

«Ja b usio addała, kab jany byli na voli. U mianie najlepšy muž i najlepšy syn», — dadała jana.

Na pytańnie prakurora ab majomaści ich siamji Śviatłana Japryncava adkazała, što jany vałodajuć kvateraj i domam u Minsku, leciščam. Taksama ŭ jaje, muža i syna jość aŭtamabili. «Na ŭsie nakładzieny aryšt», — paviedamiła žančyna.

U sudzie abvieščany pierapynak da čaćviarha, 14 lipienia. Saviak zajaviŭ, što 19 lipienia na pracesie pavinien źjavicca Michaił Mamiašvili. Pavodle nieaficyjnaj infarmacyi, na nastupnym tydni ŭ sud taksama mohuć dastavić Juryja Čyža.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?