Pra heta havorycca ŭ paviedamleńni arcybiskupa, mitrapalita Minska-Mahiloŭskaha Tadevuša Kandrusieviča, raźmieščanym na sajcie catholic.by.
«Admieniena pastanova ab nieŭzhadnieńni dušpastyrskaj dziejnaści troch śviataroŭ z Polščy. Infarmacyju ab hetym kuryja Minska-Mahiloŭskaj archidyjacezii atrymała z Adździeła pa spravach relihij i nacyjanalnaściaŭ pry Saviecie Ministraŭ Respubliki Biełaruś 14 lipienia», — adznačajecca ŭ paviedamleńni.
«Takim čynam śviatary a. Raman Šulc OP — probašč parafii Sv. Kazimira ŭ Mahilovie, kanvientualny franciškanin a. Lech Bachanek OFM Conv — probašč parafii Sv. Michała Archanioła ŭ Iviancy, abłat a. Ježy Katoŭski OMI — probašč parafii Najśviaciejšaha Serca Jezusa i sv. Kryštafa ŭ Kałodziščach (Minski r-n)
buduć praciahvać svaju dušpastyrskuju dziejnaść na svaich miescach u našaj krainie.
Kuryja Minska-Mahiloŭskaj archidyjacezii vykazvaje padziaku orhanam dziaržaŭnaj ułady za pierahlad hetaj spravy.
Asobnuju padziaku za salidarnaść, malitvu i nieabyjakavaść ad imia Katalickaja Kaścioła prynosim usim tym, chto adrehavaŭ na paviedamleńnie kuryi.
Hłybokapavažanyja śviatary, praciahvajcie zaklikać usich viernikaŭ da ščyraj malitvy ab paklikańniach da śviatarskaha i manaskaha žyćcia ŭ našaj krainie», — adznačajecca ŭ paviedamleńni mitrapalita Tadevuša Kandrusieviča.
Jak paviedamiŭ BiełaPAN pres-sakratar Kanfierencyi katalickich biskupaŭ u Biełarusi ksiondz Juryj Sańko, pakul dakładna nieviadoma, na jaki termin było padoŭžany dazvoł na słužeńnie ŭ Biełarusi trom nazvanym śviataram. «Heta zaŭsiody pa-roznamu: byvaje, i na paŭhoda dajuć, byvaje, i na try miesiacy, i na hod. Na heta ŭpłyvajuć roznyja faktary: dakumienty pavinny być u paradku, termin dziejańnia pašparta», - rastłumačyŭ jon.
Pa słovach ksiandza Juryja, situacyi, kali zamiežnym śviataram nie praciahvajuć dazvoł na słužeńnie ŭ Biełarusi i vysyłajuć z krainy, - vielmi redkaja źjava. «I kali jano adbyvajecca, to pa niejkich peŭnych pryčynach», - dadaŭ jon.
«My adkrytyja dla dyjałohu ź dziaržavaj. Dla taho i isnuje hety orhan (aparat upaŭnavažanaha pa spravach relihij i nacyjanalnaściaŭ), kab papiaredžvać kuryju pra jakija-niebudź nieparazumieńniach, kab naładžvać kantakty, kab byŭ dyjałoh. Siońnia hety dyjałoh jość, i my za heta ŭdziačnyja», - padsumavaŭ pres-sakratar Kanfierencyi katalickich biskupaŭ.
