Vice-śpikier siejma Polščy Ryšard Tarlecki ličyć, što pieryjad niavykarystanych šancaŭ va ŭzajemaadnosinach jaho krainy ź Biełaruśsiu «praktyčna zavieršany». Pra heta polski palityk zajaviŭ žurnalistam pa vynikach sustrečy sa staršynioj Pałaty pradstaŭnikoŭ Nacyjanalnaha schodu Biełarusi Uładzimiram Andrejčankam 2 žniŭnia ŭ Minsku.

Tarlecki skazaŭ, što jaho vizit zaklikany paćvierdzić, nakolki važnaja dla Polščy narmalizacyja adnosinaŭ ź Biełaruśsiu. «Biełaruś była i budzie susiedam Polščy, tamu narmalizacyja adnosin važnaja dla abodvuch bakoŭ», — padkreśliŭ jon. Vice-śpikier siejma vykazaŭ nadzieju na dalejšaje raźvićcio adnosin pamiž krainami, dla čaho parłamientaryi, pavodle jaho słoŭ, «buduć prykładać maksimum namahańniaŭ».

Polski parłamientaryj paviedamiŭ, što na sustrečy z Andrejčankam baki akreślili šerah važnych pytańniaŭ dla dalejšaha abmierkavańnia, u pryvatnaści histaryčny dyjałoh i polskaja nacyjanalnaja mienšaść u Biełarusi. «Dumaju, my pryjdziem da stanoŭčych vynikaŭ», — adznačyŭ jon.

Tarlecki taksama źviarnuŭ uvahu na toje, što Polšča ź`iaŭlajecca svojeasablivym mostam pamiž Biełaruśsiu i Jeŭrasajuzam. «Spadziajusia, paśla vieraśnioŭskich vybaraŭ da vas nie budzie pytańniaŭ, i adnosiny Biełarusi i ES praciahnuć narmalizacyju», — zajaviŭ jon.

Siońnia parłamienckaja delehacyja Polščy taksama sustreniecca sa staršynioj Savieta Respubliki Michaiłam Miaśnikovičam. Na 3 žniŭnia zapłanavanyja sustrečy z namieśnikam ministra zamiežnych spraŭ Alenaj Kupčynoj i mitrapalitam Minska-Mahiloŭskim arcybiskupam Tadevušam Kandrusievičam, a taksama naviedvańnie Kurapataŭ. 4 žniŭnia projduć sustrečy z pradstaŭnikami miascovych uładaŭ i polskaj abščyny ŭ Baranavičach, u Breście delehacyja pahutaryć z polskimi biźniesmienami, jakija inviestujuć u Biełaruś.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?