«Hetaj natatkaj ja pačynaju letapis ab niejmaviernaj mužnaści i hieraiźmie, hodnych inšaha prymianieńnia, kiraŭnikoŭ i mieniedžaraŭ kampanii Biełavija, prajaŭlenych u baraćbie z «tłustymi katami i vašyvymi błychami», a mienavita pasažyrami biznes-kłasa.

samolety.org

Pačałasia hetaja baraćba dosyć daŭno, ale pakolki jana viałasia ŭ ramkach niabačnaj i nieabjaŭlenaj vajny, to adzin z bakoŭ, a mienavita pasažyr biznes-kłasa, h.zn. ja, ničoha nie viedaŭ pra heta, a značyć i zvodak z paloŭ bitvy da hetaha času nie było. Viadoma ž, isnavali asobnyja vypleski na staronkach knihi skarhaŭ i prapanoŭ, ale heta ŭsio prachodziła pa-za publičnym polem i, napeŭna, kranała i chvalavała hierojaŭ-avijataraŭ.

Znachodžańnie ŭ cieniu i pa-za zasłužanaj uvahaj kryŭdziła i złavała kiraŭnikoŭ kampanii, i jany šukali i prydumlali ŭsio novyja i bolš vydaskanalenyja mietady naniasieńnia škody kamfortu i zdaroŭju klijentaŭ, jakija płaciać šalonyja hrošy za ŭbohi servis. Ale ciapier, sa źjaŭleńniem hetaha letapisu, spadziajusia, uznaharoda znojdzie hierojaŭ.

Takim čynam, letapis pieršy: rejs Minsk—Ryha, 11.08.16, 9:00

Pieršy ŭdar drobny, ale prykmietny Biełavija nanosić užo kala stojki rehistracyi. U praviłach, pra jakija ŭ adnym ź listoŭ paviedamlała Biełavija (moj raman u listach ź Biełavija moža kali-niebudź budzie apublikavany), było skazana, što jany abaviazvajucca rabić asobnuju stojku rehistracyi pasažyraŭ biznes-kłasa. Ale zakony vajennaha času dyktujuć svaje normy. Z metaj maksimalnaha vykarystańnia partyzanskaha patencyjału astatnich pasažyraŭ dadzienaha rejsa, na stojcy visić znak sumieščanaha absłuhoŭvańnia jak pasažyraŭ ź biznesu, tak i ŭsich astatnich hramadzian. Raźlik štaba vierny: naiŭny biznes-kłas sprabuje ŭdakładnić paradak rehistracyi, i jamu miła adkažuć: «Idzicie biez čarhi». I hora jamu, kali jon hetamu pavieryć i pasprabuje padyści prosta da stojki. Chvala narodnaha hnievu abryniecca jamu na śpinu: «My tut ź dziećmi i starymi staim u čarzie, a jon pre, jak tank. Stralać takich treba. A jašče kapialuš nadzieŭ». Heta samaje prystojnaje, što atrymaje čałaviek, jaki vyrašyŭ zekanomić svoj čas (ale nie hrošy, bo kvitok u biznes-kłas kaštuje ŭ razy daražej, čym zvyčajna) ad nie viedajučych ničoha ab praviłach absłuhoŭvańnia pasažyraŭ. I jany majuć racyju: abaviazak rehulavać čarhu pavinien lažać na avijakampanii abo słužbach aeraporta, a nie na stychijnych masach pasažyraŭ. Ale ja ciorty kałač, i ŭ hety raz pryjšoŭ amal pad zasłonu rehistracyi i paźbieh partyzanskaj zasady.

Dalejšyja dziejańni hora-biznespasažyra taksama mocna adroźnivajucca ad pryniatych u bolšaści krain praktyk. U aeraporcie navat nie čuli pra takuju opcyju, jak Fast track, h.zn. pra śpiecyjalny prachod dla ludziej, jakija majuć prava na chutkuju praceduru prachodžańnia kantrolu biaśpieki. Nu dy i dobra — u Ryhu laciać nie šmat čałaviek. Niervaŭ i času hetaja pracedura ŭ mianie nie zajmaje, choć žadańnie ŭ avijakampanii nanieści škodu vyrazna prastupaje: u adny prachadnyja varoty jany sprabujuć nakiravać pasažyraŭ troch rejsaŭ. Ale hety streł taksama mima: mnie pašancavała i ja ŭchiliŭsia, čarhi nie było. Sama pracedura prachodžańnia — moj honar. Ja pa pravie liču svajoj zasłuhaj ŭ niaroŭnaj baraćbie ź Biełavija, što jość u ich biaspłatnyja bachiły dla pasažyraŭ, jakija zdymajuć abutak. Pryčym dla luboha kłasa. Ale pra heta treba raspaviadać va ŭžo zhadanym ramanie ŭ listach.

Dalej pašpartny kantrol i cud: zona duty-free i zała dla pasažyraŭ biznes-kłasa. Tut u mianie źjaŭlajecca zahadkavaja niavyznačanaść: ź niejkaha momantu hetyja elemienty (zona biaspošlinnaha handlu i zała absłuhoŭvańnia biznes-pasažyraŭ) majuć inšuju tanalnaść i nakiravanaść. A mienavita: rastuć i raźvivajucca, demanstrujučy luboŭ i žadańnie dapamahčy klijentu. Pakolki heta ŭ korani adroźnivajecca ad met i zadač vyšejšaha kiraŭnictva aeraporta i Biełavija, to ja mahu skazać, što heta albo zamanucha, z metaj usypleńnia pilnaści voraha i naniasieńnia jamu, rasśleblenamu, sieryi niečakanych i ad hetaha bolš razburalnych udaraŭ, albo dziejańnie padryŭnych i dyviersijnych elemientaŭ u tyle samaj ahresiŭnaj u adnosinach da klijentaŭ kampanii. Dalej vy ŭbačycie, što ŭ mianie jość padstavy mierkavać, što pieršy varyjant najbolš imavierny. Ale pry ŭsim pry tym, dziejańni supracoŭnikaŭ i sami zony zasłuhoŭvajuć chvały.

Takim čynam, paśla drobnych styčak i vyłazak ja apynajusia ŭ zonie sapraŭdnaha kamfortu. Jašče raz dziakuj miłym dziaŭčatam, jakija albo vialikija aktrysy, kali śviadoma pracujuć na Biełavija i sapraŭdy razumiejuć svaju rolu, jak usyplalnic pilnaści pasažyraŭ, albo ščyra nie viedajuć, što robiać, i pracujuć dobra ź lubovi da bližniaha (klijenta). Taki kłopat asabliva dziejničaje na ŭražlivych i daŭnich klijentaŭ, jakija pamiatajuć chamstva i biaźmiežža ŭ biznes-załach aeraporta Minsk-2 raniej. Cikaŭnych znoŭ ža adpraŭlaju pavyvučać zapisy knih skarhaŭ i prapanoŭ za papiarednija hady.

Ale niama ničoha viečnaha pad miesiacam, i voś užo para na vychad, i dažoŭvajučy svoj apošni, a ad hetaha jašče bolš smačny tvarožny syrok, ja sychodžu na pasadku. Nie varta zhadki takaja drobiaź (jakaja prysutničaje ŭ bolšaści aeraportaŭ, ale navat nie źjaŭlajecca ŭ samym strašnym śnie kiraŭnictva), jak asobnaja čarha i transpart dla dastaŭki biznes-pasažyraŭ. I voś ja na borcie.

I tut u boj iduć hałoŭnyja siły i reziervy staŭki hałoŭnakamandavańnia słužbaŭ avijacyi Biełarusi. Jany patrabujuć łakaničnaha i padrabiaznaha apisańnia.

1. Samalot, na jakim my lacim — CRJ — 100/200. U im nie toje što adsutničajuć šerahi kresłaŭ dla biznes-kłasa, ale i najaŭnyja kresły — złamanyja. Zychodziačy z taho, što samalot pavinien prachodzić pieradpalotnuju padrychtoŭku, možna zrabić vysnovu, što złamanaje kresła pakinuta admysłova. Moža, viadoma, ja i niedaaceńvaju supiernika, i złamali jaho śviadoma pierad vyletam, ale heta tady zasłuhoŭvaje asobnaj chvały. Padstupstva zaklučajecca navat nie ŭ tym, što siadzieć niazručna mnie, a ŭ tym, što znoŭ zadziejničajecca resurs partyzanskaha hnievu astatnich pasažyraŭ: siadajučy ŭ złamanaje kresła, ja pieraškadžaju śpinkaj nastupnamu šerahu i vyklikaju spraviadlivaje abureńnie pakryŭdžanych pasažyraŭ. Udałaje skiravańnie narodnaj chvali abureńnia suprać «zažertych aliharchaŭ».

2. Nastupny adčuvalny ŭdar — rassadka. Pakolki samalot nie całkam ukamplektavany pasažyrami, to mnohija siadziać nie parami, a pa adnym. Heta dosyć kamfortna. Inšaja sprava biznes-kłas: tut ludziej pasadzili parami, i jany cisnucca adzin da adnaho, jak sieladcy ŭ blašancy. Asabliva heta raduje tych, chto viedaje roźnicu ŭ košcie kvitkoŭ biznes-kłasa i zvyčajnych. Viedaj našych!

3. Pakolki šerahi biznesu raźmieščanyja ŭ pačatku sałona samalota, to, jak praviła, hetyja pasažyry zachodziać u kancy čarhi, kab nie pieraškadžać astatnim hramadzianam. I tut nas čakaje nastupny pradumany i dziorzki vypad: pasažyry zaniali ručnoj pakłažaj usie palički nad biznes-šerahami, i vietlivy biznes-kłas sa svaimi kiejsami i devajsami moža raźmiaščacca jak atrymajecca, kančatkova pazbaŭlajučy siabie prastory dla manieŭru i ruchu.

Vynik: praciŭnik (biznes-pasažyr) — abjekt usieahulnaj nianaviści — nie ruchajecca.

Ja nie daŭ siabie zabić kančatkova i admoviŭsia ad prapanavanaha śniadanku, spraviadliva miarkujučy, što na vajnie jak na vajnie. I chto jaho viedaje, što budzie utrymlivacca ŭ miasnoj narezcy abo ahurku, jakuju łaskava prapanoŭvajuć na borcie pa sapraŭdnamu vietlivyja i simpatyčnyja bortpravadnicy. Mužnaści hetych dziaŭčat možna tolki pazajzdrościć (praŭda tolki ŭ tym vypadku, kali jany nie ŭ zmovie z kiraŭnictvam kampanii): bo heta jany cierpiać stohny i kryki jašče žyvych, śmiarotna paranienych, ale prytomnych pasažyraŭ biznes-kłasa.

Asoby cynizm apošniaha ŭdaru zaklučajecca ŭ tym, što navat knihi skarhaŭ na bort užo nie zapytaješ, a značyć, i nadziei na źmieny niama. Ale ž druhi raz pra knihu spytaju.

Na hetym ja zaviaršaju letapis pieršy pra biassłaŭnuju baraćbu kampanii Biełavija z vartymi žalu pasažyrami biznes-kłasa. Na žal, u mianie niama nadziei, što hety letapis budzie pieršym i apošnim. Bolš za toje, ja ŭpeŭnieny, što jon vykliča abureńnie i kryki ab niespraviadlivaści i praduziataści paasobnych asabliva pieraborlivych hramadzian, jakija haniać honar i hodnaść adzinaj i niepaŭtornaj kampanii-pieravozčyka ŭ RB. Ale maŭčać bolš ja nie mahu. Kolki mnie jašče pryjdziecca palotać u biznes-kłasie Biełavija, nie viedaju, ale kali ja nie viarnusia, ličycie mianie niavinnaj achviaraj nieabjaŭlenaj vajny.

Da sustrečy (spadziajusia) paśla zvarotnaha rejsa z Ryhi».

Клас
Панылы сорам
Ха-ха
Ого
Сумна
Абуральна