Daśledčyki z Madrydskaha univiersiteta imia Karłasa III vyśvietlili, što ŭsich ludziej pavodle typu asoby možna padzialić na čatyry hrupy: zajzdrośniki, aptymisty, piesimisty i davierlivyja indyvidy. Pra heta raspaviadajecca ŭ artykule, apublikavanym u navukovym časopisie Science Advances.
U ramkach ekśpierymientu navukoŭcy prymusili 541 čałavieka raźbiracca ŭ roznych sacyjalnych situacyjach. Pry hetym rašeńni paddoślednyja mahli prymać jak va ŭłasnych intaresach, tak i ŭ intaresach cełaj hrupy. Paśla ŭvieś masiŭ rašeńniaŭ i ich nastupstvaŭ padvierhnuŭsia analizu z dapamohaj kampjuternaha ałharytmu.
Pavodle vynikaŭ daśledavańnia, 90 adsotkaŭ ludziej padpadajuć pad najaŭnyja čatyry katehoryi: 30 adsotkaŭ apynulisia zajzdrośnikami, astatnija 60 - aptymistami, piesimistami i davierlivymi ludźmi (pa 20 pracentaŭ na kožnuju z katehoryj). Astatnija 10 adsotkaŭ kampjutar nie zmoh adnieści ni da adnoj z katehoryj.
Navukoŭcy adznačajuć, što taki sposab kłasifikacyi hrup indyvidaŭ ŭžyvajecca ŭ dačynieńni da ludziej ŭpieršyniu.
