Misija Mižnarodnaha valutnaha fondu na čale ź Piteram Dołmanam budzie pracavać z 19 vieraśnia pa 1 kastryčnika.
Papiaredniaja misija MVF naviedała Biełaruś u kancy červienia z metaj acanić najaŭnuju ekanamičnuju palityku ŭładaŭ zhodna z artykułam IV statuta fondu. Pavodle vynikaŭ vizitu Dołman zajaviŭ, što MVF pazityŭna aceńvaje reformy ŭ biełaruskaj ekanomicy, ale ličyć nieabchodnym ich pahłybić i paskoryć. Akramia taho, adznačyŭ jon, MVF raźličvaje na publikacyju vynikaŭ niezaležnaj dyjahnostyki biełaruskich bankaŭ i rekamienduje biełaruskim uładam pravieści šyrokuju dyjahnostyku siektara dziaržpradpryjemstvaŭ. «My padzialajem metu ŭrada pa stopracentnaj kampiensacyi vydatkaŭ na pasłuhi ŽKH nasielnictvam da 2018 hoda», — zajaviŭ taksama Dołman.
Kiraŭnik misii abviaściŭ prahnoz MVF pra pierśpiektyvy biełaruskaj ekanomiki: «My čakajem, što recesija ŭ Biełarusi ŭ 2016—2017 hadach budzie zachoŭvacca». Zhodna z acenkaj fondu, VUP krainy ŭ 2016 hodzie źnizicca na 3%, u 2017-m — na 0,5%.
U svaju čarhu staršynia praŭleńnia Nacyjanalnaha banka Pavieł Kałaur u lipieni zajaŭlaŭ, što bačańnie strukturnych aśpiektaŭ pavyšeńnia efiektyŭnaści nacyjanalnaj ekanomiki «ŭ cełym supadaje z pazicyjaj Mižnarodnaha valutnaha fondu, vyjaŭlenaj padčas apošniaj (červieńskaj) misii».
Biełaruskija ŭłady raźličvajuć na novuju prahramu supracoŭnictva z fondam, zapytvajučy ŭ MVF kredyt na 3 młrd dołaraŭ pad 2,28% hadavych terminam na 10 hadoŭ. Jak zajaviŭ premjer-ministr Andrej Kabiakoŭ na naradzie ŭ kiraŭnika dziaržavy ŭ śniežni 2015 hoda, «nieabchodna pryciahnuć jak maha na bolš kamfortnych umovach pa terminach i košcie resursy MVF». Alaksandr Łukašenka ŭ adkaz zajaviŭ, što kredyt MVF — heta «dobry kredyt, z dobrym abjomam resursaŭ i dobrym pracentam». «Nichto nam, u tym liku i rasijanie, pad takija pracenty kredytaŭ nie daje. Nam heta vyhadna», — skazaŭ jon.
U 2009—2010 hadach Biełaruś atrymała ad MVF u miežach prahramy stand-by piać tranšaŭ kredytu na 3,46 młrd dołaraŭ.
