U chodzie praviadzieńnia apieratyŭna-vyšukovych mierapryjemstvaŭ supracoŭnikami kryminalnaha vyšuku sumiesna z kalehami ź inśpiekcyi pa spravach niepaŭnaletnich Zavodskaha RUUS Minska vyśvietlenyja asoby niepaŭnaletnich, jakija źbili pažyłoha mužčynu ŭ tralejbusie.
Incydent adbyŭsia 24 žniŭnia. Pozna ŭviečary paciarpieły razam z žonkaj viartaŭsia dadomu. Na adnym z prypynkaŭ u tralejbus maršrutu № 3, jaki jechaŭ pa Partyzanskim praśpiekcie ŭ kirunku čyhunačnaha vakzała, zajšła kampanija (chłopcy i dziaŭčyna). Viali jany siabie aburalna, hučna słuchali muzyku. Mužčyna zrabiŭ im zaŭvahu, što vyklikała mocnaje abureńnie moładzi. U vyniku piensijanier atrymaŭ cialesnyja paškodžańni spačatku ŭ tralejbusie, potym na prypynku «Aŭtazavodskaja».
Padazravanymi akazalisia navučency adnoj sa staličnych škoł: dvoje 16-hadovych vučniaŭ 10-ha kłasa i 15-hadovy navučeniec 9-ha kłasa. Jak patłumačyŭ načalnik inśpiekcyi pa spravach niepaŭnaletnich Zavodskaha RUUS Minska Vasil Kachnovič, dzieviacikłaśnik stajaŭ na ŭliku ŭ inśpiekcyi pa spravach niepaŭnaletnich za ździajśnieńnie drobnaha chulihanstva — učyniŭ bojku z adnahodkami na vulicy.
«U dačynieńni da zatrymanych Zavodskim rajonnym adździełam Śledčaha kamiteta raspačataja sprava pa častcy 2 artykuła 339 (chulihanstva) Kryminalnaha kodeksa», — paviedamiŭ načalnik kryminalnaj milicyi Zavodskaha RUUS Vital Kapilevič.