Jeŭrasajuz paćvierdziŭ svoj namier padać jašče bolš techničnaj dapamohi Dziaržatamnahladu, kali biełaruskamu rehulataru heta budzie nieabchodna, zajaviŭ žurnalistam 20 vieraśnia na placoŭcy BiełAES namieśnik hienieralnaha dyrektara pa enierhietycy Jeŭrakamisii Hierasimas Tomas.
«My padtrymlivajem užo pracu dvuch ekśpiertaŭ, jakija dapamahajuć rehulataru, i hatovyja pavialičyć abjomy techpadtrymki, — skazaŭ jon. — Kankretnaja dapamoha zaležyć ad patreb rehulatara. Kali jamu nieabchodnaja techničnaja dapamoha, kab pravodzić stres-testy, my hatovyja jaje akazać».
Jak zajaviŭ Tomas, 19 vieraśnia ekśpierty ź liku ŭdzielnikaŭ delehacyi Jeŭrakamisii, jakaja prybyła ŭ Biełaruś z dvuchdzionnym vizitam, patłumačyli miascovym śpiecyjalistam, jak pravodziacca stres-testy ŭ ES, a taksama jak jany byli arhanizavanyja ŭ Šviejcaryi, Armienii i na Tajvani.
«Ciapier my čakajem, što biełaruski rehulatar i Ministerstva enierhietyki znoŭ źviažucca z nami i paviedamiać nam pra hrafik praviadzieńnia rabot», — skazaŭ pradstaŭnik Jeŭrakamisii.
Kiraŭnik Dziaržatamnahlada Volha Łuhaŭskaja padziakavała jeŭrapiejskim kaleham za vizit. «Jany vielmi padrabiazna i paśladoŭna patłumačyli nam pracedury praviadzieńnia stres-testaŭ u ES. My atrymali vielizarnuju kolkaść infarmacyi, zadali ŭsie pytańni. Viadoma ž, my hatovyja prymać dapamohu ES. My zaraz vielmi aktyŭna pracujem ź jeŭrapiejskimi kalehami. U nas vykonvajucca prajekty mižnarodnaj techničnaj dapamohi pa linii ES. Lubaja dapamoha z boku vopytnych kaleh, biezumoŭna, karysnaja», — skazała Łuhaŭskaja.
Asnoŭnaj temaj vizitu delehacyi JEK źjaŭlajecca acenka ryzyki i biaśpieki atamnaj stancyi, što budujecca ŭ Biełarusi, — stres-testy. Stres-testavańnie na AES pačali pravodzić paśla avaryi na japonskaj atamnaj elektrastancyi Fukusima-1 u sakaviku 2011 hoda. 23 červienia 2011 hoda Biełaruś dałučyłasia da dekłaracyi ab usioabdymnaj acency ryzyk AES, takim čynam, pahadziŭšysia pravieści stres-testy dla atamnaj stancyi z ulikam patrabavańniaŭ, raspracavanych jeŭrapiejskaj hrupaj rehulataraŭ jadziernych abjektaŭ. Dziaržatamnahlad raspracavaŭ dakumient, u jakim faktyčna paŭtarajucca patrabavańni, što vystaŭlajucca da praviadzieńnia stres-testaŭ u krainach ES.
14 vieraśnia namieśnik ministra enierhietyki Michaił Michadziuk paviedamiŭ, što stres-testy Biełaruskaj AES buduć praviedzienyja sioleta ŭ śniežni. «Tyja abaviazacielstvy, jakija na siabie pryniała Biełaruś pa dobraachvotnym praviadzieńni stres-testaŭ, my vykonvajem. Zaklučany kantrakt z rasijskaj arhanizacyjaj na praviadzieńnie takich stres-testaŭ. Zhodna z zaklučanym kantraktam jany pavinny być praviedzienyja ŭ śniežni biahučaha hoda. Rasijskim bokam razhladajecca pytańnie pryciahnieńnia zamiežnych ekśpiertaŭ dla vykanańnia hetaj pracy», — skazaŭ čynoŭnik.
Jon rastłumačyŭ, što na asnovie vynikaŭ testavańnia budzie padrychtavany nacyjanalny dakład, jaki ŭ vyniku pieradaduć u Jeŭrakamisiju.
