U Biełarusi płanujuć źmianić pamier bujnoj i asabliva bujnoj škody pry ŭchileńni ad vypłaty padatkaŭ i zboraŭ, a taksama vyklučyć z Kryminalnaha kodeksa artykuł «Abmiežavańnie kankurencyi» i «Niezakonnaje vykarystańnie dziełavoj reputacyi kankurenta». Adpaviedny zakonaprajekt byŭ prapanavany ŭradam i moža być razhledžany deputatami ŭžo sioleta.
Pamier škody pry ŭchileńni ad vypłaty padatkaŭ pierahledziać
Papraŭki ŭ Kryminalny kodeks Biełarusi mohuć zakranuć adzin z samych «strašnych» ekanamičnych artykułaŭ — artykuł 243 «Uchileńnie ad vypłaty sum padatkaŭ, zboraŭ».
Tekst artykuła, a značyć, i adkaznaść za ŭchileńnie ad vypłaty padatkaŭ i zboraŭ nie źmianiajecca: štrafy, aryšty, abmiežavańnie abo pazbaŭleńnie voli pa-raniejšamu buduć pahražać tym, chto sprabuje padmanuć dziaržavu. A voś paniaćci «bujnoha» abo «asabliva bujnoha pamieru škody» mohuć być pierahledžanyja.
Na siońniašni dzień «bujnoj škodaj» pry ŭchileńni ad vypłaty padatkaŭ pryznajecca pamier škody, jakaja ŭ 1000 i bolš razoŭ pieravyšaje pamier bazavaj vieličyni, ustalavany na dzień ździajśnieńnia złačynstva (ad 21 000 rubloŭ, abo 10 760 dalaraŭ na siońniašni dzień). Va ŭradzie prapanujuć jaje pavialičyć da 2000 i bolš razoŭ (ad 42 000 rubloŭ, ci 21 520 dalaraŭ na siońniašni dzień).
Źmienicca i paniaćcie «asabliva bujnoj škody» — z 2500 da 3500 i bolš razoŭ pieravyšajučaj pamier bazavaj vieličyni, ustanoŭleny na dzień ździajśnieńnia złačynstva (z 52 500 da 73 500 rubloŭ, abo z 26 900 da 37 670 dalaraŭ na siońniašni dzień).
U novaj redakcyi artykuła taksama tłumačycca, jakim čynam budzie vyznačacca suma škody — «na padstavie źviestak ab ruchu hrašovych srodkaŭ pa rachunkach u banku, niabankaŭskaj kredytna-finansavaj arhanizacyi i (abo) źviestak, atrymanych ad dziaržaŭnych orhanaŭ, jurydyčnych i fizičnych asob, u paradku, ustanoŭlenym zakanadaŭstvam».
Adznačym, što artykuł 243 KK Biełarusi i pamier bujnoj i asabliva bujnoj škody byli pryniatyja jašče ŭ 1999 hodzie i z tych časoŭ nie źmianialisia.
Za parušeńnie antymanapolnaha zakanadaŭstva adkažuć i ipešniki
U artykuł 244 KK Biełarusi «Parušeńnie antymanapolnaha zakanadaŭstva» taksama ŭnosiacca źmieny.
Kali raniej kryminalnaja adkaznaść tyčyłasia «słužbovaj asoby dziaržaŭnaha ci inšaha orhana kiravańnia», to ciapier za parušeńnie antymanapolnaha zakanadaŭstva adkažuć nie tolki «słužbovyja asoby», ale i «indyvidualnyja pradprymalniki».
Minus dva artykuły ŭ KK
Taksama prapanujecca vyklučyć z Kryminalnaha kodeksa Biełarusi dva artykuły — 247 «Abmiežavańnie kankurencyi» i 248 «Niezakonnaje vykarystańnie dziełavoj reputacyi kankurenta».
Za «abmiežavańnie kankurencyi» maksimalnyja sankcyi praduhledžvajuć abmiežavańnie voli da 5 hadoŭ, za «niezakonnaje vykarystańnie dziełavoj reputacyi kankurenta» — abmiežavańnie voli da 2 hadoŭ.
Hetyja artykuły z Kryminalnaha kodeksa dublujucca praktyčna anałahičnymi artykułami ŭ Kodeksie ab administracyjnych parušeńniach. Zakonaprajekt urada taksama praduhledžvaje źmianieńnie farmulovak u artykułach KaAP i pamieraŭ štrafaŭ za hetyja parušeńni.
