Bolš za sto čałaviek paciarpieła ad dziejańniaŭ 16-hadovaha chakiera sa Stolina, jaki vykradaŭ hrošy z kartak karystalnikaŭ sacsietak. Pra heta paviedamiła ŭ efiry «Alfa Radyjo» aficyjny pradstaŭnik Śledčaha kamiteta Biełarusi Julija Hančarova.
Dadzienaja kryminalnaja sprava rasśledujecca ŭpraŭleńniem Śledčaha kamiteta pa Hrodzienskaj vobłaści. U dačynieńni da padletka raspačataja sprava adrazu pa dvuch artykułach Kryminalnaha kodeksa — častka 2 art. 349 (niesankcyjanavany dostup da kampjutarnaj infarmacyi) i častka 2 art. 212 (kradziež šlacham vykarystańnia kampjutarnaj techniki).
«Heta adna z bujnych kryminalnych spraŭ. Abjom śledčych materyjałaŭ štodnia raście, śledčyja pravodziać ahlad sajtaŭ i staronak, jakija byli ŭzłamanyja, hrošy vykradzienyja z rachunkaŭ bolš za 100 čałaviek, — raspaviała Julija Hančarova. — Suma škody da ciapierašniaha momantu składaje bolš za Br15 tys. Bolšaści asob, z rachunkaŭ jakich byli vykradzienyja hrošy, viernutyja bankami ŭ adpaviednaści z pryncypam nulavoj adkaznaści».
Ź vieraśnia 2015 pa studzień 2016 hoda małady čałaviek uzłomvaŭ asabistyja staronki karystalnikaŭ sacyjalnaj sietki «UKantakcie» i błakavaŭ ich dla raniejšych uładalnikaŭ, źmianiajučy paroli. Zavałodaŭšy akaŭntam, padazravany pad vyhladam sapraŭdnaha haspadara profilu pačynaŭ pisać paviedamleńni jaho virtualnym siabram. U paviedamleńniach jon prasiŭ karystalnikaŭ dać jamu rekvizity ich bankaŭskich płaciežnych kartak, matyvujučy heta tym, što nie moža skarystacca ułasnaj kartaj, bo jana zabłakavanaja ci ŭ jaje skončyŭsia termin dziejańnia. Niekatoryja ludzi adhukalisia na prośbu. Zajmieŭšy rekvizity, padletak vyvodziŭ hrošy z kartak, ździajśniajučy internet-pakupki albo pieraličvajučy srodki na padkantrolnyja jamu rachunki.
