AFP
Sioleta Biełaruś pavialičyła pastaŭki praduktaŭ charčavańnia ŭ Rasiju, i nijakaha błakavańnia impartu praduktaŭ u Rasiju niama. Pra heta paviedamlaje «Interfaks» sa spasyłkaj na kiraŭnika Raśsielhasnahlada Siarhieja Dankvierta.
«Źviestki pa pastaŭkach — heta najlepšy arhumient, jany pakazvajuć, što za niapoŭny hety hod — z 1 studzienia pa 18 vieraśnia biełaruskija pastaŭščyki pa asnoŭnych praduktach charčavańnia i niekatorych vidach sielhaspradukcyi ŭžo pierakryli hadavyja pakazčyki 2015 hoda», — skazaŭ Siarhiej Dankviert.
Pavodle jaho słoŭ, u hetym hodzie pastaŭki jałavičyny ź Biełarusi skłali ŭžo 102 tysiačy ton (suprać 96,8 tysiač za ŭvieś minuły), ptuški — niekalki mienš za letašni ŭzrovień, 96 tysiač ton (suprać 99 tysiač u 2015-m). Što datyčycca ŭvozu karmavych dabavak, to tut pavieličeńnie amal udvaja - 18,1 tysiačy ton (u 2015 hodzie hety pakazčyk skłaŭ 9,5 tysiač).
Taksama Dankviert pryvioŭ ličby impartu biełaruskaj «małočki» ŭ Rasiju: 619 tysiač ton z pačatku hoda (za ŭvieś minuły hod było tolki 484 tysiač). Taja ž situacyja z rybaj: 46,5 tysiač ton suprać 37,5 tysiač za minuły hod.
Akramia taho kiraŭnik Raśsielhasnahladu adznačyŭ, što realnyja ličby mohuć być jašče bolš: nie ŭsia pradukcyja prachodzić praz kantrolnyja punkty (z ulikam hetaha, ahulnyja ličby mohuć być bolš jašče prykładna na 10%).
Nahadajem, 20 vieraśnia Alaksandr Łukašenka žorstka raskrytykavaŭ pazicyju Rasii, u tym liku i pa pytańni błakavańnia biełaruskich praduktaŭ. Pavodle jaho słoŭ, u minułym hodzie handal z Rasijaj byŭ nie na lepšym uzroŭni, i pakul nahnać upuščanaje nie atrymałasia — choć abjom pastavak pavialičyŭsia, ale «ceny napałovu nižej».
«U Rasii jany (biełaruskija tavary) čamuści «niajakasnyja». Ale zrazumieła: kali my pastaŭlajem jakasny tavar i pa prymalnych cenach u Rasiju, my bjom pa kišeniach aliharchaŭ ad sielskaj haspadarki ŭ Rasii, — źviarnuŭ uvahu kiraŭnik Biełarusi. — Jany cisnuć na ŭrad (tam suviazi, vy viedajecie nie horš za mianie, jakija), a ŭrad daje kamandu «fas» roznaha rodu čynoŭnikam — ad Raśsielhasnahlada i hetak dalej. Jany ŭ nas try pradpryjemstvy adkryvajuć dla pastavak — piać zakryvajuć, piać adkryvajuć — šeść potym zakryvajuć. Idzie nieprychavany cisk».
