Prezident Ukrainy Piatro Parašenka zajaviŭ, što ŭrad Złučanych Štataŭ Amieryki pryniaŭ rašeńnie padtrymać Ukrainu šlacham pradastaŭleńnia krainie letalnaj zbroi. Hety punkt utrymlivajecca ŭ pryniatym Pałataj pradstaŭnikoŭ ZŠA zakonie «Ab padtrymcy stabilnaści i demakratyi va Ukrainie». Pra heta Parašenka napisaŭ na svajoj staroncy ŭ Facebook.
U Pasolstvie Ukrainy ŭ ZŠA paviedamili, što dakumient inicyjavany sustaršynioj Kamiteta pa zamiežnych spravach Pałaty pradstaŭnikoŭ Elijot Enhiel i ŭniesieny im sumiesna z kanhresmienam-respublikancam Adamam Kinzinhieram.
Pavodle pryniataha zakona, ZŠA nie buduć pryznavać anieksiju Rasijskaj Fiederacyjaj Krymskaha paŭvostrava. Uviedzienyja ŭ dačynieńni da RF sankcyi buduć zachavanyja da taho momantu, pakul prezident ZŠA asabista nie nakiruje ŭ Kanhres dakumient, u jakim budzie paćviardžacca adnaŭleńnie suvierenitetu Ukrainy. Akramia hetaha, asobnyja pałažeńni zakona vyznačajuć dziejańni, jakija buduć nakiravanyja na supraćdziejańnie rasijskaj prapahandzie. Taksama zhadvajecca ŭ im i pryciahnieńnie mižnarodnych inviestycyj u ekanomiku Ukrainy.
«U pieralik praduhledžanych zakonam kaardynavanych z sajuźnikami i partniorami ZŠA srodkaŭ padtrymki Ukrainy ŭklučanyja letalnyja abarončyja sistemy ŭzbrajeńniaŭ», — havorycca ŭ paviedamleńni.
Zakon nabudzie moc tolki paśla jaho padtrymki sienatam ZŠA i padpisańnia amierykanskim prezidentam.
