U Biełarusi płanujecca pryniać miery pa abmiežavańni rekłamy škodnych praduktaŭ dla dziaciej, a taksama pa poŭnaj zabaronie rekłamy piva. Takoje pałažeńnie prapisana ŭ ramkach realizacyi dziaržprahramy «Zdaroŭje naroda i demahrafičnaja biaśpieka Respubliki Biełaruś» na 2016—2020 hady, paviedamiŭ pieršy namieśnik ministra achovy zdaroŭja Dźmitryj Pinievič padčas pres-kanfierencyi ŭ pres-centry BIEŁTA 22 vieraśnia.
Płanujecca taksama źmianić narmatyvy pa ŭtrymańni cukru i soli ŭ praduktach. U pryvatnaści pa ŭtrymańni cukru pierš za ŭsio ŭ kisłamałočnaj pradukcyi dla dziaciej, a taksama pa ŭtrymańni soli ŭ kaŭbasnych, chlebabułačnych vyrabach.
Stanuć bolš žorstkimi narmatyvy ŭtrymańnia transtłuščaŭ u alejnatłuščavaj pradukcyi. Zapłanavana taksama vyklučeńnie ich ź dziciačych praduktaŭ charčavańnia, praduhledžana źnižeńnie ŭździejańnia rekłamy charčovych praduktaŭ i biezałkaholnych napojaŭ na dziaciej, abmiežavańnie rekłamy hazavanych napojaŭ dla dziaciej, charčovaj pradukcyi z vysokim utrymańniem soli, cukru, tłušču, poŭnaja zabarona rekłamy piva, pavieličeńnie času sacyjalnaj rekłamy na telebačańni.
Heta nieabchodna zrabić, padkreśliŭ Pinievič, bo ŭ Biełarusi na arteryjalnuju hipiertenziju pakutujuć bolš za 40% mužčyn i 38% žančyn, hipierchalesteryniemija sustrakajecca ŭ pałovy mužčyn i traciny žančyn pracazdolnaha ŭzrostu. Niedastatkovaja fizičnaja aktyŭnaść maje miesca ŭ 24% nasielnictva. A zališniaja masa cieła adznačajecca bolš čym u 40% nasielnictva krainy.
Śpiecyjalisty Ministerstva achovy zdaroŭja adznačajuć, što značnaja častka nasielnictva Biełarusi siłkujecca niapravilna. U racyjonie nazirajecca zališniaje ŭtrymańnie žyviolnaha tłušču, prostych vuhlavodaŭ, soli, niedastatkovaść vitaminaŭ i minierałaŭ.
Pavodle dadzienych aficyjnaj statystyki, siaredniasutačnaje spažyvańnie sadaviny i aharodniny ŭ našaj krainie składaje 350—450 hramaŭ u dzień na čałavieka, a SAAZ rekamienduje 600 hramaŭ u dzień.
Taki ład žyćcia ź`iaŭlajecca pryčynaj zališniaj vahi (57,4% darosłaha nasielnictva majuć zališniuju vaha, 24,3% — atłuścieńnie), uźniknieńnia chvarob sardečna-sasudzistaj sistemy, cukrovaha dyjabietu i ankałahičnych zachvorvańniaŭ.
