«Naša Niva» pryvodziła ścisły pierakaz artykuła, apublikavanaha rasijskim infarmacyjnym ahienctvie «Rehnum», u jakim Biełaruś nazyvajecca «zvarjaciełaj niedadziaržavaj», a biełaruskaja nacyja — vydumanaj.
Reakcyja na materyjał pajšła dalej za kamientary pad im. Žychar Kalinkavič (Homielskaja vobłaść) Dzianis Rabianok napisaŭ zajavu ŭ prakuraturu z prośbaj zavieści ŭ adnosinach aŭtara materyjała kryminalnuju spravu, a «Rehnum» — zabłakavać u Biełarusi.
«Abrazili maju hodnaść jak čałavieka i biełarusa, — patłumačyŭ «Našaj Nivie» Dzianis. — U artykule adkrytym tekstam kažuć, što biełarusy — heta navat nie narod, a mova — dyjalekt, jaki nie ciahnie na asobnuju movu. Moj dzied prajšoŭ Finskuju i Ajčynnuju vajnu, ad 1939 da 1945, ja havaru pa-biełarusku, a jany buduć nazyvać mianie ŭnukam palicaja i rusafobam? Materyjały takoha kštałtu raspalvajuć varožaść! Śćviardžeńnie «Biełaruś — zvarjaciełaja niedadziaržava, bolšaść nasielnictva jakoj choča u RF» — što heta kali nie infarmacyjnaja vajna suprać našaj krainy?»
Taksama Dzianis kaža, što historyja ŭžo viedała prykłady, kali asobnyja koły ludziej razvažali pra «nizkaje pachodžańnie» inšych i kryteryi jaho vyznačeńnia.
«Ja prašu hienieralnaha prakurora zavieści spravu pa 130 artykule Kryminalnaha kodeksa i zrabić zapyt u Ministerstva infarmacyi, kab jany zabłakavali dostup da hetaha resursu ŭ Biełarusi», — padsumavaŭ mužčyna.
Skrynšot finalnaj častki zvarotu.
