Kiraŭnikam uradaŭ krain — udzielnic JEAES pakul nie ŭdałosia ŭzhadnić Mytny kodeks. Prajekt hetaha dakumienta treba budzie ŭzhadniać na sustrečy ŭ Maskvie, skazaŭ premjer-ministr Rasii Dźmitryj Miadźviedzieŭ na pasiadžeńni Jeŭrazijskaha mižuradavaha savieta ŭ pašyranym składzie 27 kastryčnika ŭ Minsku.
government.by
U pasiadžeńni ŭdzielničali kiraŭniki ŭradaŭ usich piaci dziaržaŭ — členaŭ JEAES: premjer-ministry Armienii Karen Karapiecian, Biełarusi — Andrej Kabiakoŭ, Kazachstana — Bakytžan Sahintajeŭ i Rasii — Dźmitryj Miadźviedzieŭ, a taksama vykanaŭca abaviazkaŭ premjer-ministra Kyrhyzstana Saaranbaj Žeenbiekaŭ.
Pavodle słoŭ Miadźviedzieva, kiraŭniki ŭradaŭ krain JEAES praviali niekalki hadzin u «davoli haračych dyskusijach» adnosna padrychtoŭki novaha Mytnaha kodeksa. «Chaču skazać, što sustreča była karysnaj mienavita tamu, što zaŭsiody, kali sustrakaješsia, heta mahčymaść źniać tyja pytańni, jakija naźbiralisia i jakija na inšym uzroŭni akazałasia źniać niemahčyma, — skazaŭ Miadźviedzieŭ. — Praktyčna pałovu hetych pytańniaŭ my źniali. Niekatoraja kolkaść ich zachoŭvajecca. Tamu my damovilisia praciahnuć abmierkavańnie i ŭ samaj karotkaj pierśpiektyvie, na praciahu najbližejšych troch tydniaŭ, sustrecca ŭ Maskvie, kab pastaracca daŭzhadnić najaŭnyja roznahałośsi».
Miadźviedzieŭ adznačyŭ, što ŭ novym Mytnym kodeksie zakładzienyja pieradumovy dla pierachodu da adzinaha mytnaha rehulavańnia. «Rasija vystupaje za toje, kab heta byŭ poŭnafarmatny paŭnavartasny dakumient pramoha dziejańnia, nie padzieleny na častki, nie siehmientavany na niejkija adrezki, a mienavita jaki vyznačaje toje, jak budzie isnavać Mytny sajuz, budzie isnavać Mytny kodeks i raźvivacca, adpaviedna, naš Jeŭrazijski sajuz», — skazaŭ Miadźviedzieŭ.
Razam z tym, zaznačyŭ u svaim vystupie premjer-ministr Rasii, «Jeŭrazijski sajuz u nas upeŭniena raźvivajecca». «Niahledziačy na niespryjalnyja ekanamičnyja ŭmovy, udzielnaja vaha ŭzajemnaha handlu raście i dasiahnuła 14,2% ad ahulnaha abjomu. Jašče kolki hadoŭ tamu jana była pryblizna 11%. Heta ŭsio ž taki ruch napierad, a nie ŭ advarotnym kirunku», — zajaviŭ Miadźviedzieŭ.
Pavodle jaho słoŭ, hałoŭnymi na hety momant źjaŭlajucca zadačy «pa stvareńni narmatyŭnaj asnovy, udaskanaleńnie narmatyŭna-pravavoj bazy i pieraadoleńnie adstavańnia ŭ padrychtoŭcy dakumientaŭ druhoha ŭzroŭniu». «Treba vykonvać uziatyja adzin pierad adnym abaviazacielstvy pa farmiravańni adzinych rynkaŭ. My damaŭlalisia, što ad hetaha adychodzić nie budziem. U hetym napramku treba pracavać», — skazaŭ Miadźviedzieŭ.
Jon padkreśliŭ, što nieabchodna praciahvać pracu pa likvidacyi pieraškodaŭ pa čatyroch svabodach. «Adzinaja prastora biez vyklučeńniaŭ, barjeraŭ i abmiežavańniaŭ — heta najvažniejšy składnik ŭstojlivaha rostu, — zajaviŭ rasijski premjer-ministr. — I niahledziačy na toje što my sprabujem damaŭlacca z našymi partniorami pa supracoŭnictvie ŭ miežach zon svabodnaha handlu, jašče bolš važnym źjaŭlajecca ŭstaranieńnie ŭnutranych barjeraŭ».
U svaju čarhu premjer-ministr Biełarusi Andrej Kabiakoŭ u svaim vystupie zajaviŭ ab najaŭnaści prablemnych momantaŭ u jeŭrazijskaj intehracyi. «Pierš za ŭsio chacieŭ by źviarnuć uvahu na rehularnaje pryniaćcie na nacyjanalnych uzroŭniach pratekcyjanisckich pa svajoj sutnaści rašeńniaŭ, jakija supiarečać duchu i litary sajuza. Prykłady dobra viadomyja», — skazaŭ jon.
Pavodle słoŭ biełaruskaha premjera, nie tak aktyŭna, jak chaciełasia b, baki ruchajucca da ŭzhodnienaj sielskahaspadarčaj palityki, subjekty haspadarańnia skardziacca na adsutnaść roŭnaha dostupu da dziaržzakupak i tranzitu.
«Ale ž stvarali my sajuz, kab prablem va ŭzajemnym handli stała mienš. Kali my nie likvidujem isnyja barjery na dvuchbakovym uzroŭni supracoŭnictva, nie stvorym ŭnutry sajuza roŭnyja ŭmovy dla subjektaŭ haspadarańnia, sajuz naš budzie słabym i naŭrad ci zdoleje abaranić intaresy našych subjektaŭ haspadarańnia navat na terytoryi sajuza», — zajaviŭ Kabiakoŭ.
U liku pazityŭnych prykładaŭ ŭzajemadziejańnia ŭ miežach JEAES jon pryvioŭ praviedzienuju ŭ 2016 hodzie libieralizacyju ŭnutranych kabatažnych pieravozak, uchvaleńnie kancepcyj ahulnych rynkaŭ hazu, nafty i naftapraduktaŭ, a taksama ŭviadzieńnie novych techrehłamientaŭ.
