Biełaruskija spartśmieny, pazbaŭlenyja alimpijskich miedaloŭ za ŭžyvańnie zabaronienych preparataŭ, nie buduć viartać pryzavyja hrošy, atrymanyja ad dziaržavy za hetyja ŭznaharody, paviedamiła 27 kastryčnika pres-sakratar Nacyjanalnaha alimpijskaha kamiteta Anastasija Marynina.
«Nie isnuje jurydyčnaj pracedury viartańnia pryzavych, jana nie prapisanaja ŭ zakanadaŭstvie. Hetaja pracedura sapraŭdy znachodzicca ŭ stadyi raspracoŭki, ale terminy jaje zacviardžeńnia pakul nieviadomyja», — rastłumačyła jana.
Za dva dni Mižnarodny alimpijski kamitet (MAK) pazbaviŭ Biełaruś troch alimpijskich miedaloŭ.
26 kastryčnika MAK abviaściŭ ab pazbaŭleńni biełaruskich štanhistaŭ Anastasii Novikavaj i Andreja Rybakova uznaharod Alimpijady-2008 za ŭžyvańnie zabaronienych preparataŭ.
Novikava była bronzavym pryzioram Piekina ŭ vahavoj katehoryi da 53 kh. Paŭtornaje daśledavańnie jaje dopinh-proby z vykarystańniem sučasnych technałohij vyjaviła najaŭnaść dehidrachłormietyłtestasteronu (turynabołu) i stanazałołu. U probie Rybakova, jaki zaniaŭ druhoje miesca ŭ vahavoj katehoryi da 85 kh, byli vyjaŭlenyja tyja ž rečyvy.
27 kastryčnika bronzavaha miedala Alimpijskich hulniaŭ-2012 u vahavoj katehoryi da 69 kh była pazbaŭlenaja Maryna Škiermankova. Pavodle vynikaŭ pierapravierki dopinh-probaŭ Hulniaŭ u Łondanie ŭ Škiermankovaj vyjaŭlenyja zabaronienyja preparaty turynaboł i stanazałoł.
U Piekinie pryzavyja byli ŭstalavanyja ŭ nastupnym pamiery: 100 tys. dalaraŭ za zołata, 50 tys. — za sierabro, 30 tys. — za bronzu. Na Łondan ich pavialičyli da 150 tys., 75 tys. i 50 tys. dalaraŭ.
