Sud Dobrušskaha rajona razhledzieŭ na zakrytym pasiadžeńni kryminalnuju spravu pa abvinavačańni miascovaha žychara 1966 hoda naradžeńnia.
Jak paviedamlaje pres-słužba Homielskaha abłasnoha suda, sud pryznaŭ žychara rajcentra vinavatym u inšych dziejańniach seksualnaha charaktaru, učynienych nasupierak voli paciarpiełaj, z prymianieńniem hvałtu, z vykarystańniem biezdapamožnaha stanu paciarpiełaj, paŭtorna, asobaj, jakaja raniej učyniła zhvałtavańnie, ździejśnienych u dačynieńni da zaviedama małaletniaj, i u zamachu na pałavyja znosiny nasupierak voli paciarpiełaj, z prymianieńniem hvałtu, z vykarystańniem biezdapamožnaha stanu paciarpiełaj (zhvałtavańni) zaviedama małaletniaj.
Kančatkova žycharu Dobruša pryznačanyja 15 hadoŭ pazbaŭleńnia voli z adbyvańniem pakarańnia ŭ papraŭčaj kałonii va ŭmovach ŭzmocnienaha režymu. Prysud nie ŭvajšoŭ u zakonnuju siłu i moža być abskardžany i apratestavany.
Nahadajem, paciarpiełymi pa kryminalnaj spravie byli pryznanyja dźvie małaletnija dziaŭčynki. Hvałt adbyvaŭsia ŭ dziciačym domie siamiejnaha typu, vychavankami jakoha byli paciarpiełyja, dzie akramia ich było jašče šaściora dziaciej.
Hvałtaŭnik — muž vychavalnicy dziciačaha doma. Raniej jon taksama byŭ vychavalnikam, ale potym pajšoŭ pracavać u inšuju śfieru. Muž i žonka, jakija vyhadavali dvuch bijałahičnych dziaciej, vyjhrali prava stać vychavalnikami praz rajonny konkurs. U dziaržaŭnych orhanaŭ, jakija adkazvajuć za zachavańnie pravoŭ dziaciej, nie było pretenzij da baćkoŭ-vychavalnikaŭ. Siamja vyjhravała na roznych konkursach pryzavyja miescy.
Raniej hramadski rezanans atrymała padobnaja historyja ŭ Śvietłahorsku. Hałava siamji (taksama dziciačy dom siamiejnaha typu), u jakoj vychoŭvalisia 13 dziaciej, za hvałtoŭnyja seksualnyja dziejańni ŭ dačynieńni da niepaŭnaletnich vychavanak byŭ asudžany na 15 hadoŭ kałonii, a jaho rodny syn, na toj momant 17-hadovy, za zhvałtavańni atrymaŭ 9 hadoŭ.
