Viarchoŭny sud Aŭstryi adkłaŭ abvinavaŭčy prysud u vyhladzie šaści hadoŭ turmy ŭ dačynieńni da 20-hadovaha biežanca ź Iraka, jaki zhvałtavaŭ ŭ basiejnie dziesiacihadovaje dzicia. Sudździa Tomas Filip adpraviŭ materyjały na darasśledavańnie, paviedamlaje Orf.at.
Incydent zdaryŭsia ŭ śniežni 2015 hoda ŭ adnym z basiejnaŭ u Vienie i vyklikaŭ vialiki hramadski rezanans. Biežaniec ź Iraka pa imi Amir, jaki atrymaŭ dazvoł na žycharstva pa prahramie intehracyi, zhvałciŭ dziesiacihadovaha Horana. Seksualny kantakt adbyŭsia ŭ adnoj z kabinak dla pieraapranańnia.
Pa słovach chłopčyka, jon paznajomiŭsia ŭ basiejnie z 15-hadovym padletkam ź siamji irakskich uciekačoŭ. Kali Horan paśla basiejna nakiravaŭsia ŭ duš, 20-hadovy Amir, jaki supravadžaŭ jaho novaha siabra, upichnuŭ chłopčyka ŭ tualetnuju kabinku i zhvałciŭ jaho.
Baćki chłopčyka Horana, sierba pa pachodžańni, pražyvajuć u Aŭstryi z 90-ch hadoŭ. Adrazu paśla incydentu chłopčyk źviarnuŭsia da ratavalnikaŭ, jakija dziažuryli ŭ basiejnie. Jany vyklikali «chutkuju dapamohu» i palicyju. Mihranta aryštavali prosta ŭ basiejnie.
Jak akazałasia, 20-hadovy taksist ź Iraka prybyŭ u Aŭstryju ŭ vieraśni 2015 hady pa Bałkanskim maršrucie. U Iraku ŭ Amira zastalisia žonka i dvoje dziaciej.
Padčas dopytu mihrant pryznaŭsia ŭ zhvałtavańni. Jon taksama zajaviŭ, što pryčynaj, jakaja šturchnuła jaho na złačynstva, stała seksualnaje ŭstrymańnie na praciahu čatyroch miesiacaŭ i «jarka vyražanaja praźmiernaść seksualnaj enierhii». Toje, što adbyłosia, mihrant nazvaŭ «vialikaj pamyłkaj».
Amir pieršapačatkova płanavaŭ prabracca ŭ Šviecyju, ale vyrašyŭ zastacca ŭ Aŭstryi i padaŭ prašeńnie ab pradastaŭleńni prytułku. Na sudzie mužčyna zajaviŭ, što nie źbirajecca jaho adklikać i spadziajecca na stanoŭčaje rašeńnie mihracyjnych orhanaŭ, paśla čaho płanuje pieravieźci ŭ Aŭstryju žonku i dziaciej.
Praces pa spravie, jaki prachodziŭ pa prośbie paciarpiełaha boku ŭ zakrytym režymie, niekalki razoŭ adkładaŭsia. Chłopčyk prachodziŭ abśledavańnie ŭ suviazi z paškodžańniem unutranych orhanaŭ, u jaho zafiksavanyja posttraŭmatyčnym sindrom i depresija.
Amiru pahražaje 10 hadoŭ turmy za zhvałtavańnie, pry hetym termin moža pavialičycca i da 15 hadoŭ, kali ekśpiertyza paćvierdzić, što jaho achviara atrymała surjoznyja psichičnyja i maralnyja traŭmy.
Sud pieršaj instancyi paličyŭ vinu hramadzianina Iraka dakazanaj i prysudziŭ jaho «za zhvałtavańnie i ciažki seksualny hvałt» da šaści hadoŭ turemnaha źniavoleńnia.
Ciapier Viarchoŭny Sud Aŭstryi admianiŭ prysud i pryznačyŭ paŭtornyja słuchańni. Spravu adpravili na pierahlad.
Paŭtorny praces u dačynieńni da Amira A. pavinien prajści ŭ 2017 hodzie. Da hetaha času hvałtaŭnik budzie znachodzicca ŭ kamiery papiaredniaha źniavoleńnia.
