«Darahija surodzičy, darahija biełarusy va ŭsim śviecie, skančajecca 2016 hod, i nadyjšoŭ čas nam padvieści jahonyja vyniki.
Razam z usim śvietam my pieražyvajem napružanyja časy. Palityčnyja padziei hetaha hodu ŭ ZŠA, Vialikaj Brytanii, Rasiei i inšych krainach raspačali ŭ śviecie peryjad niepradkazalnaści, jaki niasie dla Biełarusi bolšyja ryzyki, čym dla mnohich inšych krainaŭ, — havorycca ŭ zvarocie.
Jak i raniej, najbolšuju niebiaśpieku dla Biełarusi ŭtvaraje pahroza niezaležnaści z boku ciapierašniaj aŭtarytarnaj Rasiei. Vielmi niepakoić aktyvizacyja ahresiŭnaj prapahandy ŭ praŭładnych rasiejskich ŚMI: prapahandy napoŭnienaj nianaviściu da Biełarusi i biełaruskaha narodu. Vielmi niepakojać zakulisnyja pieramovy pamiž biełaruskim i rasiejskim dyktatarami, ekanamičny cisk i asabliva nieadnaznačnyja rasiejskija vajskovyja pierasoŭvańni kala biełaruskaj miažy. Padziei, jakija adbyvalisia va Ukrainie ad 2014 hodu, nie dazvalajuć spakojna nazirać za hetym.
Niama sumnievu ŭ tym, što Rasieja jość naš susied, i niahledziačy na supiarečlivuju historyju našych dačynieńniaŭ, Biełaruś i Rasieja pavinny žyć u siabroŭstvie i dobrasusiedztvie, hruntujučysia na ŭzajemnaj pavazie.
Ale niezaležnaść — heta najvialikšaja i najvažniejšaja kaštoŭnaść dla luboha narodu, u tym liku i dla našaha, biełaruskaha. Na žal, u ciapierašni čas nam znoŭ davodzicca ŭsurjoz dumać pra nieabchodnaść dla biełarusaŭ baranić hetuju niezaležnaść sa zbrojaj u rukach. Pryčym ad ludziej, jakija chočuć nazyvać siabie našymi bratami.
Sytuacyja robicca bolš napružanaj i ŭnutry Biełarusi. Jaje ekanomika znachodzicca ŭ ciažkim kryzisie, u toj čas, kali ekanomika ŭsich susiednich eŭrapiejskich krainaŭ raście. Dabrabyt biełarusaŭ praciahvaje paharšacca. Heta jaŭny znak taho, što ciapierašniaja madel kiravańnia krainaj daŭno vyčarpała svoj resurs, što Biełaruś patrabuje surjoznych reformaŭ va ŭsich sferach: jak u ekanomicy, tak i ŭ palitycy, tak i ŭ hramadzkim žyćci.
2016 hod adznačyŭsia aktyvizacyjaj kantaktaŭ pamiž aficyjnymi biełaruskimi ŭładami i pradstaŭnikami krainaŭ Volnaha Śvietu. Heta jość dobra, bo patencyjna nabližaje pieraadoleńnie mižnarodnaj izalacyi našaj Baćkaŭščyny. Ale suśvietnaja supolnaść pavinna razumieć, što sastupki mienskamu režymu niedapuščalnyja biez kankretnych i adčuvalnych krokaŭ u kirunku demakratyzacyi ŭ Biełarusi. Mienski aficyjny režym dahetul nie zrabiŭ takich krokaŭ. Praciahvajecca pieraśled biełarusaŭ dziela palityčnych matyvaŭ, praciahvajecca cenzura i prapahanda ŭ hałoŭnych biełaruskich ŚMI. Parlamenckija vybary, što prajšli ŭ 2016 hodzie, byli takimi ž niesumlennymi i sfalsyfikavanymi — takim-ža padmanam i abrazaj biełaruskaha narodu — jak i ŭsie papiarednija vybary j referendumy za apošnija voś užo bolš jak dvaccać hadoŭ.
Aficyjnaja biełaruskaja ŭłada pavinna ŭśviedamlać, što demakratyja i ekanamičnyja reformy nieabchodnyja z punktu hledžańnia biełaruskich nacyjanalnych i dziaržaŭnych intaresaŭ. Biełaruski narod dastojny taho, kab žyć u svajoj ułasnaj demakratyčnaj krainie, kab mieć takija ž samyja pravy i svabody, jak majuć našyja susiedzi ŭ inšych krainach Eŭropy. Abaviazak ludziej, jakija ščyra kłapociacca pra dabrabyt biełarusaŭ, a nie pra ŭłasnuju karyść za narodny košt — dać biełarusam hetyja pravy i svabody.
2016 hod byŭ hodam niekalkich važnych hadavinaŭ.
Roŭna dvaccać piać hadoŭ tamu Biełaruś stała niezaležnaj ad SSSR i adnaviła svoj dziaržaŭny suverenitet. Voś užo čverć stahodździa naša Radzima jość paŭnavartasnaj mižnarodna pryznanaj dziaržavaj. Za heta šmat hadoŭ pierad hetym zmahalisia i za heta malilisia biełarusy va ŭsim śviecie. I nijakija vonkavyja i ŭnutranyja niepryjacieli za hety čas tak i nia zdoleli pazbavić nas niezaležnaści. Biełaruś adbyłasia jak paŭnavartasnaja dziaržava. My dabilisia vialikaj histaryčnaj pieramohi, jakuju nichto nia zdoleje ŭ nas adabrać.
Roŭna tryccać hadoŭ prajšło z dnia Čarnobylskaj avaryi — samaj strašnaj ekalahičnaj katastrofy ŭ historyi čałaviectva, u epicentry jakoj było nakanavana apynucca našaj Baćkaŭščynie. Heta strašnaje vyprabavańnie dla našaj Biełarusi, jakoje dahetul nie pieraadolenaje — i pieraadolvać jakoje pieraškadžaje biezadkaznaja palityka ŭładaŭ.
Taksama dvaccać hadoŭ prajšło z sumnaviadomaha niezakonnaha referendumu 1996 hodu, jaki staŭ zaviaršalnym etapam dziaržaŭnaha pieravarotu ŭ Biełarusi i zrabiŭ jaje dyktaturaj i satelitam Rasiei. Ale navat hety referendum tak i nie złamaŭ naš biełaruski volny duch, pra jaki śpiavajecca ŭ našym himnie, Vajackim Maršy. U ciažkich umovach, nasupierak dyskryminacyi, praciahvaje isnavać i siłami prostych ludziej raźvivacca biełaruskaja mova, praciahvajuć vydavacca knihi pra praŭdzivuju biełaruskuju historyju, praciahvaje łunać Štandar naš bieł-čyrvona-bieły i mčać staradaŭniaja Pahonia — u pryvatnych damach, na vopratcy i na aŭtamabilach. I, hałoŭnaje, Biełaruś zastajecca niezaležnaj. Z hetym ciapier vymušany mirycca i hetuju niezaležnaść ciapier vymušany sprabavać umacoŭvać i aŭtarytarny režym u Miensku.
Nastupny hod budzie taksama asablivy ŭ tym, što tyčycca jubilejaŭ. U 2017 hodzie my pačniem adznačać stahodździe zdabyćcia Biełarusiaj niezaležnaści. Dramatyčnyja padziei 1917 hodu adyhrali losavyznačalnuju rolu dla Biełarusi i stvaryli pieradumovy dla abviaščeńnia ŭ 1918 hodzie niezaležnaj i demakratyčnaj Biełaruskaj Narodnaj Respubliki. 2017 hod — heta sotyja ŭhodki Pieršaha Ŭsiebiełaruskaha Kanhresu, jaki byŭ klučavoj padziejaj na šlachu da stvareńnia niezaležnaj Biełarusi i na jakim była ŭtvoranaja Rada BNR jak pieršapačatkova Rada Ŭsiebiełaruskaha Kanhresu.
Darahija ziemlaki ŭva ŭsim śviecie: na Bieraściejščynie j Viciebščynie, na Haradzienščynie, Homielščynie j Mahiloŭščynie; u Miensku i ŭ maich rodnych Stoŭpcach; u Polščy j Čechii, u Rasiei i va Ŭkrainie, u ZŠA i Kanadzie, Vialikaj Brytanii i Belhii i ŭsich inšych krainach, dzie žyvuć našyja surodzičy.
Vinšuju vas z Naradžeńniem Chrystovym, niezaležna ad kalendaru, pavodle jakoha śviatkujecie, i z Novym Hodam. Chaj hety śviatočny čas pryniasie ŭsim nam radaść ad stasavańnia ź blizkimi i nadzieju na ščaślivy novy 2017 hod. My pavinny žyć nadziejaj i vieraj u lepšaje, u toje, što budučynia pryniasie Biełarusi doŭhačakanaje vyzvaleńnie — i tak jano abaviazkova j budzie».
