Symptamatyčnymi i niebiaśpiečnymi nazvali ŭdzielniki prahramy «Biełaruś-1» «Klub redaktaraŭ» chvalu antybiełaruskich publikacyj u rasiejskaj medyjasfery.

«Kali pišuć, što Biełaruś — niedadziaržava, biełarusy — nie nacyja, chiba heta nie metanakiravanaja dezinfarmacyja z metaj destabilizacyi dziaržavy?», — zadaŭsia pytańniem staršynia Nacyjanalnaj dziaržaŭnaj teleradyjokampanii Hienadź Davydźka.

Jon zhadaŭ skandalnyja zajavy Leanida Rašetnikava, jaki publična zajaviŭ ab štučnaści biełaruskaj movy i dziaržaŭnaści

«Nu zbałbatnuŭ niešta pensijaner, nu pakazaŭ siabie poŭnym dyletantam — nu što z taho? Bałbatunoŭ chiba nie sustrakali? A moža heta nie dakarać treba, a ŭvodzić kryminalnuju adkaznaść?», — adznačyŭ jon.

Redaktar «SB-Biełaruś siehodnia» Pavał Jakubovič u svaju čarhu zajaviŭ, što kryminalnuju adkaznaść moža ŭvodzić i nia varta, ale ŭ zhadanych publikacyjach jon bačyć peŭnuju tendencyju.

«Rašetnikaŭ — heta vielmi vysokapastaŭleny pensijaner maskoŭski, hienerał-lejtenant niejkich specsłužbaŭ. Hety čałaviek švendajecca pa surjoznych pryjomnych. Ja nie dumaju, što toje, što jon robić, kładziecca na stoł Pucinu abo Patrušavu — heta hłupstva. Ale ŭražańnie stvarajecca, što ŭ niejkich uładnych kalidorach jon byvaje i niejkija plotki słuchaje. Tamu zajava, što biełaruskaja mova źjaviłasia tolki ŭ 1926 hodzie… Jon mabyć retranśluje niejkija dumki, mabyć, heta na niejkim uzroŭni ŭ Maskvie padahravajecca dumka takaja. Zhadajem i «Riehnum» (heta taksama nie z pavietra biarecca), ciapier hetuju zajavu i inšyja zajavy ŭ rasiejskaj błahaśfiery»

Na dumku Jakuboviča, padobnyja publikacyi majuć adnačasova i stanoŭčy efekt u hramadztvie: «Ahulnaja kansalidacyja adbyłasia — nu nia treba nas abražać!».

Davydźka nazvaŭ takija vykazvańni, jakija hučać u Rasiei, «symptamatyčnymi i navat niebiaśpiečnymi».

«Kali heta kaža vyviednik, choć i były, jaki maje dostup u niejkija kabinety, značyć jon vykazvaje niečy punkt hledžańnia. I na hetuju temu treba havaryć z našymi bratami-rasiejcami, i treba stavić kropki nad «i» — chłopcy, nielha tak, treba pavažać adzin adnaho!», — upeŭnieny jon.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?