U svaim pieršym intervju jeŭrapiejskim ŚMI Tramp skazaŭ, što Jeŭrapiejski Sajuz — heta najpierš «łakamatyŭ dla Hiermanii». I niedvuchsensoŭna dadaŭ: «Ja liču, što inšyja buduć sychodzić», jak heta płanuje zrabić Vialikabrytanija.

Da hetych słoŭ dadałosia abiacańnie pryjarytetna zaklučyć damovu ab svabodnym handli z Brytanijaj — sihnał inšym patencyjnym kandydatam na vychad.

70 hadoŭ ZŠA bačyli ŭ Jeŭropie procivahu Savieckamu Sajuzu i Rasii, važnaha i nadziejnaha sajuźnika.

Tramp ža bačyć u Jeŭrasajuzie ekanamičnaha, handlovaha kankurenta i tamu maje namier asłablać jaho. ES ekspartuje ŭ ZŠA bolš, čym impartuje — značyć, ES praciŭnik.

Takaja łohika stała šokam dla jeŭrapiejskich lidaraŭ.

Čytajcie jašče: Donald Tramp i novy suśvietny paradak — artykuł «Špihiela»

Płan Trampa

70 hadoŭ ZŠA spryjali jeŭrapiejskamu adzinstvu. Hetaja kraina realizavała płan Maršała, padtrymlivała stvareńnie adzinaha jeŭrapiejskaha rynku i spryjała pašyreńniu Jeŭropy na Uschod paśla padzieńnia žaleznaj zasłony. A ciapier u Bieły dom pryjšoŭ čałaviek, jaki — prynamsi na słovach — raźličvaje na raspad ES.

Bolš za toje, jahonyja žadańni supadajuć z metami Pucina. Rasija aktyŭna pracavała na razvał Jeŭrasajuza ŭsie apošnija hady.

Unutryamierykanskija sprečki — kansiervatyŭny ci libieralny padychod da abortaŭ, dapuščalnaje i niedapuščalnaje ŭ publičnaj rytorycy, prava na vałodańnie zbrojaj, pryjom imihrantaŭ i tym bolš Obamacare — majuć na Biełaruś uskosny ŭpłyŭ. U nas svoj ład, svaje zvyčki i tradycyi, jany ŭstojlivyja, źmianiajucca z časam, ale nie chutka, i amierykanskija ŭzory pracujuć nie ŭsie i nie zaŭždy.

Namier Trampa abmiežavać handal z Kitajem, Mieksikaj ci Niamieččynaj budzie ŭpłyvać na suśvietnuju ekanomiku ŭ cełym i ceny na naftu ŭ pryvatnaści, ad jakich zaležyć rasijezaležnaja biełaruskaja haspadarka. Bajusia, vynikaŭ handlovaj vajny ZŠA z Kitajem nie moža pradkazać nichto ŭ śviecie — navat kiraŭnica Fiederalnaj reziervnaj sistemy ZŠA.

Cikava, što suśvietnyja rynki amal nijak na hetuju pahrozu nie reahujuć. Mahčyma, biznes nie vieryć, što hetyja pahrozy buduć Trampam realizavanyja.

Mahčyma, ničym nie skončacca i pahrozy Trampa na adras ES i NATA. I heta dobra, bo raspad Jeŭrasajuza i Paŭnočnaatłantyčnaha aljansu mieŭ by dla Biełarusi vyznačanyja i jasna niehatyŭnyja nastupstvy.

Dla Biełarusi Jeŭrasajuz pry ŭsich svaich słabaściach i ŭmoŭnaściach byŭ polusam — simvaličnym, ale taksama i ekanamičnym i, patrochu, taksama palityčnym, jaki ŭraŭnavažvaŭ polus Rasii.

Polusy siły vakoł Biełarusi

Minsk moh doŭha i drobiazna dražnić i krytykavać Jeŭrasajuz — za što atrymlivaŭ hrošy ad Rasii. Biełaruś pry hetym niakiepska adčuvała siabie miž dvuma polusami siły — Rasii i Jeŭrasajuza. Pieryjad pašyreńnia Jeŭrasajuza i rostu jaho ekanomiki byŭ adnačasova pieryjadam, kali Biełaruś dasiahnuła raniej niaznanaha dabrabytu.

Samaje strašnaje dla Biełarusi i rehijona stałasia b, kali b pačali pierakrojvać miežy. Strašnaje — bo sama Biełaruś maje najsłabšaje «nacyjanalnaje pačućcie» i pry hetym najmacniejšuju enierhietyčnuju zaležnaść. Kali kaho i zachočuć «źjeści nie padaviŭšysia», to heta jaje.

Kaniečnie, paśla 70 hadoŭ miru ŭ Jeŭropie ciažka pavieryć, što vypadkovaja pieramoha papulista na prezidenckich vybarach u ZŠA zdolnyja za niekalki hadoŭ pierakulić usiu sistemu jeŭrapiejskich adnosin.

U kožnym razie, Tramp razhladaje mižnarodnyja adnosiny jak zero sum game, u adroźnieńnie ad Abamy ź jaho aściarožnym i časta navat nierašučym pošukam win win.

Rola Niamieččyny i Polščy i vybar Minska

Ciapier usie pohlady źviernutyja na Hiermaniju. Usio ž Hiermanija bahaciejšaja za Rasiju i maje kałasalny intelektualny patencyjał.

Hiermanija, imavierna, moža raźličvać na poŭnuju padtrymku krain Skandynavii, Bałtyi, Centralnaj Jeŭropy. Napeŭna, i Francyja da Lo Pen nikoli nie apuścicca.

40-miljonnaja Polšča — taksama mocnaja ekanomika, što za apošnija dziesiacihodździ nazapasiła 100-miljardnyja zołatavalutnyja reziervy.

Ci zmoža Anhieła Mierkiel zachavać adzinstva Jeŭrasajuza? Kali ES ci, prynamsi, jahonaje jadro vyjdzie z hetaha vyprabavańnia cełym, to jon vyjdzie i macniejšym.

Pakinuty i adkinuty Amierykaj Jeŭrasajuz volens nolens budzie naroščvać i svaje abaronnyja mahčymaści.

Kali Rasija nie budzie zamachvacca na miežy i suvierenitet, to Biełaruś zastaniecca jaje satelitam.

Kali ž Rasija budzie zamachvacca, to Biełaruś u pošukach procivahi Rasii moža pasprabavać zblizicca z Polščaj, Niamieččynaj i skandynaŭskimi krainami. Navat źmienšany ŭ pamierach Jeŭrasajuz zastaniecca ekanamičnym hihantam i nośbitam vialikich idej i kaštoŭnaściaŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?