Prezident ZŠA Donald Tramp padpisaŭ vykanaŭčy ŭkaz ab vychadzie ZŠA z pahadnieńnia ab Tranścichaakijanskim partniorstvie (TCP), piša Bi-bi-si.
Getty
Tramp abiacaŭ zrabić heta jašče padčas svajoj vybarčaj kampanii. Takim čynam novy prezident pačaŭ mianiać handlovuju palityku ZŠA.
Raniej Tramp zajaŭlaŭ, što TCP ujaŭlaje saboj patencyjnuju katastrofu dla ZŠA.
Pavodle jaho słoŭ, dla ZŠA budzie bolš vyhadna zaklučać dvuchbakovyja handlovyja pahadnieńni, jakija i pavinny pryjści na źmienu TCP.
Takija pahadnieńni, na dumku Trampa, dazvolać viarnuć u ZŠA pramysłovaść i pracoŭnyja miescy.
U paniadziełak Donald Tramp abiacaŭ surjozna źnizić padatki i spraścić rehulavańnie dla kampanij, jakija zachavajuć u ZŠA pracoŭnyja miescy. Hetamu papiaredničała sustreča z pradstaŭnikami bujnych pramysłovych kampanij.
Tym ža kampanijam, jakija ŭsio-taki vyvieduć pramysłovuju vytvorčaść z ZŠA, Tramp abiacaŭ «vielmi vialikija padatki na miažy».
Tranścichaakijanskaje partniorstva (TCP) - handlovy pakt, jaki ŭ lutym 2016 hoda padpisali 12 krain Azijacka-Cichaakijanskaha rehijonu.
Udzielnikami pahadnieńnia akramia ZŠA stali Japonija, Kanada, Aŭstralija, Novaja Ziełandyja, Mieksika, Pieru, Čyli, Małajzija, Bruniej, Sinhapur i Vjetnam. Na krainy, jakija ŭvachodziać u handlovy sajuz, prychodzicca 40% usioj suśvietnaj ekanomiki.
Udzielniki ździełki ličyli, što jana dapamoža ŭmacavać ekanamičnyja suviazi ŭ rehijonie. Pakt mierkavaŭ skaračeńnie handlovych taryfaŭ u Azijacka-Cichaakijanskim rehijonie. Jaho prychilnikam byŭ były prezident ZŠA Barak Abama.
Tramp, jak čakajuć žurnalisty i ekśpierty, pačnie pierahlad i Paŭnočnaamierykanskaha pahadnieńnia ab svabodnym handli, jakoje zaklučyli pamiž saboj ZŠA, Kanada i Mieksika.
