Alaksiej Dziermant (pieršy źleva), Piotra Piatroŭski (druhi źleva), Alaksandar Špakoŭski (pieršy sprava).
17 sakavika ŭ polskim Sejmie była zaplanavanaja kanferencyja «Polšča—Biełaruś. Supolnaja spadčyna — supolnaja adkaznaść». Jaje arhanizatarami vystupili eŭraskieptyčnyja partyi «Svabodnyja i salidarnyja» i «Adzinstva narodu».
Jak stała viadoma Svabodzie, uviečary ŭ paniadziełak hanarovy vice-śpikier Sejmu Kornel Maraviecki, pryniaŭ rašeńnie nie pravodzić jaje ŭ Sejmie.
Jašče rankam, u vysłanaj ŚMI prahramie, jaho imia značyłasia siarod arhanizataraŭ. Ź biełaruskaha boku ŭ sustrečy anansavaŭsia ŭdzieł praŭładnych palitolahaŭ Alaksieja Dziermanta, Alaksandra Špakoŭskaha i Piatra Piatroŭskaha.
Jak raspavioŭ Svabodzie historyk Mikoła Ivanoŭ, jaki pavinien byŭ maderavać sustreču, Kornel Maraviecki pieršapačatkova nia byŭ aznajomleny ź bijahrafijami častki ŭdzielnikaŭ kanferencyi.
Mikoła Ivanoŭ
Ivanoŭ: Ja taksama raniej pra mnohich nia mieŭ paniaćcia. Mnie spačatku skazali, što heta maładyja navukoŭcy. Potym ja atrymaŭ pra hetych ludziej infarmacyju i ciapier maju razumieńnie, chto heta. Heta vielmi pravakacyjnyja asoby. Ja razmaŭlaŭ z Kornelem Maravieckim i jon taksama nia choča mieć z hetym ničoha supolnaha. Tamu ŭ Sejmie hetaja kanferencyja nie adbudziecca. Na maje słovy pra toje, što častka ŭdzielnikaŭ heta «ahienty Rasiei», arhanizatar kanferencyi adkazaŭ, što i ich varta pasłuchać. Mahčyma jon budzie pravodzić jaje ŭ inšym miescy. Ale ja jašče nie pryniaŭ rašeńnie, ci budu ŭ joj udzielničać.
Pieršapačatkova ŭ prahramie było proźvišča byłoha kandydata ŭ prezydenty Alaksandra Milinkieviča, ale jon raspavioŭ Svabodzie, što admoviŭsia prymać u joj udzieł. Pryčynaj stała skandalnaja reputacyja jaje ŭdzielnikaŭ.
