Lider arhkamitetu Biełaruskaha nacyjanalnaha kanhresu, były eks-kandydat u prezydenty i palitviazień Mikoła Statkievič nia pryjdzie na akcyju «My nie darmajedy» 15 sakavika ŭ Miensku, ale biare na siabie adkaznaść za praviadzieńnie šeścia ŭ centry horadu 25 sakavika, na Dzień Voli.
Palityk ličyć, što ŭznačalić šeście musić adzin čałaviek, i mienavita jon najlepš spravicca z hetaj rolaj.
«Iści dazvolenym maršrutam na płošču Banhałor — heta nie dla mianie»
— Ci padtrymajecie vy svaim udziełam akcyju «My nie darmajedy» 15 sakavika ŭ Miensku?
— Hetaja akcyja sankcyjanavanaja, ale ŭ mianie jość matyvy, kab nie prychodzić na jaje. Ja stolki adsiedzieŭ nie dla taho, kab chadzić u miesca, pra jakoje Łukašenka kazaŭ «Voś chaj tam i źbirajecca toje «otriebje»». Ja nie «otriebje». Ale, mahčyma, u akcyi 15 sakavika jość sens: jana lehalnaja, biaśpiečnaja i dla novych ludziej, vierahodna, pryvabnaja. Ale heta nie dla mianie.
— Toje, što akcyja dazvolenaja, dla vas padstava na jaje nie iści?
— Ja skažu tolki toje, što hałoŭnaja akcyja adbudziecca 25 sakavika, ja za jaje biaru adkaznaść na siabie. Ja liču, što cisk na ŭłady pavinien uzrastać, kožny nastupny krok pavinien być bolš mocnym.
— Ci byli ŭ vas pieramovy z arhanizatarami akcyi 15 sakavika ŭ Miensku, z arhkamitetam kampanii «My nie darmajedy»?
— Ja sustreŭsia ź imi, padzialiŭsia dośviedam, raskazaŭ usie niuansy roznych varyjantaŭ dziejańniaŭ. Ale ja navat nia staŭ čakać ichnaha rašeńnia. Kudy jany vyrašać iści — heta ich adkaznaść: i palityčnaja, i jurydyčnaja. Ja nijakim čynam nie chaču im pieraškodzić. Ale maja pazycyja viadomaja. Ja dumaju, što akcyja 15 sakavika pavinna być, jak chočuć arhanizatary, biaśpiečnaj dla ŭdzielnikaŭ. Heta važna i istotna taksama i dla mianie. Ale nikoli nie chadžu tudy (na Banhałor — R.S.).
«Kali ty adkazny za vialikuju akcyju, nielha jechać na rehijanalnyja»
— Čamu vy nia brali ŭdziełu ŭ akcyjach pratestu ŭ rehijonach?
— Jość takoje praviła, jakoje zvyčajna viedajuć usie, chto zajmajecca palitykaj u našaj krainie. Kali ty adkazny za hałoŭnuju akcyju, tabie nielha ŭdzielničać u niesankcyjavanych rehijanalnych akcyjach. Tamu što ciabie lohka neŭtralizujuć.
«Biaru na siabie kiravańnie akcyjaj 25 Sakavika»
— Vy planujecie ŭznačalić akcyju 25 sakavika i pravieści jaje pad lozunhami z palityčnymi i ekanamičnymi patrabavańniami. Ale ŭ toj ža čas i ŭ tym ža miescy źbirajecca štohadovaja akcyja na Dzień Voli. Ci ŭzhadniajecie vy svaje plany z tymi arhanizacyjami, jakija padavali ŭ Mienharvykankam zajaŭku?
— My abmiarkoŭvali hetuju sytuacyju. Hetyja arhanizacyi vykazvajuć žadańnie sabracca 25 sakavika kala Akademii navuk i iści ŭ centar horadu. Tut našy žadańni supadajuć. Ja b chacieŭ, viadoma, adrazu iści ŭ centar, ale dziela jednaści pahadziŭsia na inšaje miesca zboru. Nakolki ja zrazumieŭ, nichto nia budzie suprać, kali ja vaźmu kiravańnie akcyjaj na siabie. Heta budzie vielmi składanaja demanstracyja dla arhanizataraŭ. Tamu kiravańnie pavinna być adnaasobnaje. Kažuć, ad kamisaraŭ u Čyrvonaj armii admovilisia jašče ŭ 1941 hodzie, tamu što jany zaminali. Tamu, ja dumaju, zajaŭniki nia buduć suprać, kali ja paviadu hetuju demanstracyju. Tut nie da palityčnych krokaŭ i žartaŭ. U nas šmat vydatnych ambitnych palitykaŭ, ale dla taho, kab paźbiehnuć sytuacyi 2010 hodu, treba adnaasobnaje kiravańnie. Kalehi mnie davieryli heta, i ja heta vykanaju. Heta pravilna, tamu što ja maju najbolšy dośvied.
«Liču, što ŭłady nia buduć čynić pravakacyjaŭ»
— Jak vy bačycie akcyju 25 sakavika?
— Ja zrablu ŭsio, kab demanstracyja prajšła hodna i mirna. Ja ščyra skažu, što nia vieru ŭ pužałki ab pravakatarach. Pravakacyi ŭ nas zaŭsiody arhanizoŭvaje tolki adzin bok — heta sama ŭłada, inšaha nie było. Uładzie ciapier nie da pravakacyjaŭ, joj patrebny hrošy z Zachadu. I jašče: kali chočuć pravakacyjaŭ, to nikoha nie papiaredžvajuć. Kali ŭłady sami lamantujuć ab pravakacyjach, značyć, jany sami hetaha nia chočuć. Tamu ja spadziajusia, što ŭsio budzie narmalna. U nas jość peŭnaja jednaść. Ja nia dumaju, što niechta budzie piarečyć majmu rašeńniu ŭziać kiravańnie na siabie. Ja nie źbirajusia ničoha šturmavać, ale treba pakazać volu narodu, treba vyznačyć, jak my dalej budziem prymušać uładu da dyjalohu z narodam.
— Vy kažacie, što inšyja palityčnyja lidery nia buduć suprać, kab vy ŭznačalili akcyju 25 sakavika. Ale prynamsi troje ź ich u hety dzień jašče buduć za kratami…
— Viedajecie, ja nie razumieju takich pavodzinaŭ. 15 sakavika ludzi pryznačyli akcyju, uziali adkaznaść za jaje. Viedajuć, što iduć aryšty. I pajechali ŭ rajcentry. Što, u Maładečnie i Voršy nie było kamu pravieści hetyja akcyi? Navošta pierad vialikaj akcyjaj jechać na rehijanalnyja maršy? Heta supiarečyć usiamu, što ja viedaju pra abaviazki lidera akcyi.
