Biełaruskija navučalnyja ŭstanovy masava pačali šukać, čym zaniać svaich navučencaŭ 15 sakavika. Mienavita na hety dzień ludzi ŭ sacyjalnych sietkach damovilisia na praviadzieńnie pratestnych maršaŭ u Minsku, Hrodnie i Mahilovie.
Univiersitety i kaledžy tym časam vykarystoŭvajuć administratyŭny resurs, kab šerahi pratestoŭcaŭ nie papoŭnilisia studentami.
Tak, naprykład, Haradzienski humanitarny kaledž prydumaŭ konkurs na najlepšaje vykanańnie dziaržaŭnaha himna. Projdzie jon uviečary 15 sakavika. «Jaŭka stroha abaviazkovaja», — nahadvajecca ŭ abjavie ab konkursie.
«Kali chtości nie pryjdzie? Budziem pracavać z hetymi navučencami, kab u nastupny raz jany pryjšli. Heta hramadzianska-patryjatyčnaje vychavańnie, navučency musiać viedać himn i ściah svajoj krainy i ŭmieć śpiavać himn svajoj krainy. Što ŭ hetym drennaha?» — prakamientavała «Našaj Nivie» situacyju Julija Sidarovič, namieśnik dyrektara pa vučebnaj pracy.
Ale kali ŭ čałavieka inšyja płany?
«Jakija płany ŭ jaho mohuć być? Nu jakija kankretna? Kali čałaviek navučajecca, jaho hałoŭny zaniatak — navučańnie. A ŭ nas adukacyjny praces uklučaje ŭ siabie aŭtamatyčna vučebnuju pracu i vychavaŭčuju. My Kodeks ab adukacyi nie parušajem», — zapeŭniła Sidarovič.
Akramia konkursaŭ, šerah univiersitetaŭ i kaledžaŭ abvieścili, što litaralna adzin dzień zaniatki buduć pravodzicca ŭ druhuju źmienu.
Hetym adznačylisia Minski dziaržaŭny kaledž budaŭnictva i kamunalnaj haspadarki, Minski dziaržaŭny palitechničny kaledž, Minski aŭtamiechaničny kaledž i šerah inšych.
Abjava ŭ Minskim palitechničnym kaledžy
«Ničoha nadzvyčajnaha — prosta pierad zaniatkami buduć pravodzicca mierapryjemstvy, źviazanyja z Dniom Kanstytucyi», — patłumačyła «Našaj Nivie» Taćciana Šmakava, namieśnik dyrektara pa vučebna-mietadyčnaj pracy Minskaha palitechničnaha kaledža.
Anałahičnyja paviedamleńni — ab raptoŭnym zaciahvańni zaniatkaŭ da viečara ci pieranosie pieršaj źmieny na druhuju — prychodziać i ad studentaŭ univiersitetaŭ.
