Barys Šyrynha i Mikałaj Čarnavus-małodšy pierad pačatkam sudovaha pasiadžeńnia 15 sakavika. Fota: Juryj Pivavarčyk
Barysu Šyrynhu i zavočna Michaiłu Strelčyku — pa 345 rubloŭ (15 bazavych vieličyń), a Mikałaju Čarnavusu-małodšamu — 12 sutak administracyjnaha aryštu. 15 sakavika sud Baranavickaha rajona i horada Baranavičy vynies pryhavor aktyvistam za ŭdzieł u «niesankcyjanavanym pikiecie na płoščy Lenina», pieradaje baranavicki partał intex-press.by.
Pasiadžeńnie pačałosia 14 sakavika, ale z-za taho, što aktyvistam uručyli pozvy napiaredadni viečaram, jany nie paśpieli aznajomicca z materyjałami spravy i naniać advakataŭ, pasiadžeńnie pieranieśli na 15 sakavika.
U sieradu na sud pryjšli były pradprymalnik Mikałaj Čarnavus-małodšy i biespracoŭny Barys Šyrynha. Biespracoŭny ekanamist Michaił Strelčyk nie źjaviŭsia, tamu što źjechaŭ u Rasiju na sumoŭje. Jon paprasiŭ sud pryznać pryčynu jaho adsutnaści ŭvažlivaj i pieradaŭ ksierakopiju kvitkoŭ.
Jašče adzin fihurant spravy — Jaŭhien Žuraŭski — taksama na sud nie źjaviŭsia. Choć, jak patłumačyła sudździa, «jaho mama patelefanavała i skazała, što pozvu jon atrymaŭ». Chto hety čałaviek, nichto z baranavicki aktyvistaŭ nie viedaje. Mikałaja Čarnavusa-starejšaha taksama na sudzie nie było. Jaho syn skazaŭ karespandentu, što baćku pozvu nie ŭručyli.
Padčas sudovaha pasiažeńnia byli dapytanyja Mikałaj Čarnavus-małodšy i Barys Šyrynha. Abodva zajavili, što nie zhodnyja z pratakołami, jakija byli na ich składzienyja supracoŭnikami milicyi, i vinu svaju nie pryznajuć. Pa ich słovach, na mitynhu prysutničali supracoŭniki milicyi, tamu jany paličyli, što mitynh sankcyjanavany.
Śviedkami pa spravie prachodzili dva supracoŭniki milicyi: Anastasija Biełanovič i Dźmitryj Kazačenka. Abodva milicyjanta byli na mitynhu ŭ cyvilnym, nikoha nie zatrymlivali i pratakołaŭ u hety dzień nie składali. Jany raspaviali, što na mitynhu parušalniki vykazvali niezadavolenaść uładaj i zaklikali «nie być rabami i nie płacić padatak na darmajedstva».
Sud pryznačyŭ pakarańnie Barysu Šyrynhu i zavočna Michaiłu Strelčyku pa 345 rubloŭ (15 bazavych vieličyń), a Mikałaju Čarnavusu-małodšamu — 12 sutak administracyjnaha aryštu.
Dla Mikałaja Čarnavusa-małodšaha prysud akazaŭsia niečakanym.
— Ja pakul trochi ŭ šoku. Ja psichałahična rychtavaŭ siabie da takoha pavarotu padziej, ale akazaŭsia nie hatovy. Chutčej za ŭsio, budu abskardžvać prysud, — skazaŭ jon Intex-press.
Biespracoŭny Barys Šyrynha padzialiŭsia ź Inteks-pres, što nie viedaje, jak apłacić štraf.
— Chaj sadžajuć, chaj što chočuć robiać, ja nie viedaju, dzie brać hetyja hrošy, — rastłumačyŭ Barys Šyrynha.
