U Breście na skryžavańni z kruhavym rucham adbylisia dva DTZ ź intervałam u 38 chvilin. U pieršym vypadku ŭ avaryju trapiła 38-hadovaja žančyna, u druhim — jaje muž, jaki śpiašaŭsia na dapamohu žoncy. DTZ adbylisia 14 sakavika, paviedamlaje DAI Bresckaj vobłaści.
Videa: WikiLink Internet-Pravajder
Pieršaja avaryja adbyłasia kala 16:00. Žančyna na Renault jechała pa darožnym kole. Pavodle papiaredniaj viersii, pry źjeździe ź jaho joj nie sastupiŭ darohu Volkswagen Sharan. Udzielniki DTZ paviedamili pra zdareńnie ŭ DAI.
Pakul inśpiektar afarmlaŭ avaryju, a 16:38 na hetym ža kole adbyłosia druhoje DTZ, paviedamili ŭ DAI vobłaści. Na hety raz kiroŭca Opel Zafira pry ŭjeździe na koła nie sastupiŭ darohu aŭtamabilu. Avaryja adbyłasia prykładna za 20 mietraŭ ad pieršaha DTZ. Jak vyśvietliłasia, kiroŭca Opel Zafira — muž žančyny na Renault, jaki daviedaŭsia pra zdareńnie i śpiašaŭsia na dapamohu.
«Žančyna prasiła muža chutčej pryjechać, kab dapamahčy: ź joj znachodziłasia dačka, — raspaviała Natalla Sacharčuk, načalnik pres-słužby Dziaržaŭtainśpiekcyi rehijonu. — Dzicia jechała ŭ aŭtakreśle, što u mnohim paŭpłyvała na nastupstvy — nichto nie paciarpieŭ. Paśla padjechaŭ muž žančyny i taksama staŭ udzielnikam DTZ. U druhim vypadku paškodžańni byli minimalnymi, vadzicieli skłali Jeŭrapratakoł».
